ഇംഗ്ലണ്ടിനോട് ടെസ്റ്റ് പരമ്പരയുടെ ഷെഡ്യൂൾ നേരത്തെ ആക്കുവാൻ പറഞ്ഞ ബിസിസിഐയുടെ ആവശ്യം ഇംഗ്ലണ്ട് അംഗീകരിക്കണമായിരുന്നുവെന്ന് പറഞ്ഞ് മുൻ ഇംഗ്ലണ്ട് താരം മാർക്ക് ബുച്ചർ. ഈ അവസരം ഉപയോഗിച്ചിരുന്നുവെങ്കിൽ ഇന്ത്യയുടെ പ്രമുഖ താരങ്ങളായ എംഎസ് ധോണി, വിരാട് കോഹ്ലി, രോഹിത് ശർമ്മ എന്നിവരെ ദി ഹണ്ട്രെഡിൽ കളിപ്പിക്കുവാൻ ഇംഗ്ലണ്ട് ബോർഡിന് ആവശ്യപ്പെടാമായിരുന്നുവെന്നും ഒരു സുവർണ്ണാവസരമാണ് ഇംഗ്ലണ്ട് കളഞ്ഞതെന്നും ബുച്ചർ പറഞ്ഞു.
കഴിഞ്ഞ വർഷം ആരംഭിക്കുവാനിരുന്ന ദി ഹണ്ട്രെഡ് കോവിഡ് കാരണം ഈ വർഷത്തേക്ക് മാറ്റുകയായിരുന്നു. വലിയൊരു അവസരമാണ് ഇംഗ്ലണ്ട് ബോർഡ് നഷ്ടപ്പെടുത്തിയതെന്നാണ് തനിക്ക് തോന്നുന്നതെന്നും ഇന്ത്യയുടെ മാർക്കീ താരങ്ങളുടെ സാന്നിദ്ധ്യം ദി ഹണ്ട്രെഡിന് ജനപിന്തുണ വർദ്ധിപ്പിക്കുമായിരുന്നുവെന്നും ബുച്ചർ പറഞ്ഞു.
