ഗ്രേഡ് 1 ഹാംസ്ട്രിംഗ് പരിക്ക് കാരണം ഇംഗ്ലണ്ടിനെതിരെയുള്ള ബോക്സിംഗ് ഡേ ടെസ്റ്റില്‍ ലുംഗിസാനി ഗിഡി കളിക്കില്ലെന്ന് അറിയിച്ച് ദക്ഷിണാഫ്രിക്ക. താരം ഇതോടെ സാന്‍സി സൂപ്പര്‍ ലീഗ് ഫൈനലിലും കളിക്കില്ല. ജനുവരിയോട് കൂടി മാത്രമേ താരത്തിന്റെ ക്രിക്കറ്റിലേക്കഉള്ള തിരിച്ചുവരവ് സാധ്യമാകുകയുള്ളു. എംഎസ്എല്‍ ടി20 പ്ലേ ഓഫ് മത്സരത്തിന്റെ വാം അപ്പിന്റെ സമയത്താണ് താരത്തിന് പരിക്കേറ്റത്.
റീഹാബ് പ്രക്രിയയുമായി മുന്നോട്ട് പോയി താരത്തിനെ ജനുവരി 2020 ആവുമ്പോളേക്കും ടൈറ്റന്‍സിന് വേണ്ടി കളിക്കളത്തിലേക്ക് തിരികെ എത്തിക്കുക എന്നതാണ് തങ്ങളുടെ ലക്ഷ്യമെന്ന് ദക്ഷിണാഫ്രിക്കന്‍ ടീമിന്റെ മെഡിക്കല്‍ ഓഫീസര്‍ ഷുവൈബ് മഞ്ജ്ര പറഞ്ഞു. പരിക്ക് തുടര്‍ക്കഥയായി മാറുന്ന താരം കഴിഞ്ഞ വര്‍ഷം ജനുവരിയിലാണ് ടെസ്റ്റ് അരങ്ങേറ്റം നടത്തിയതെങ്കിലും ഇതുവരെ അഞ്ച് ടെസ്റ്റില്‍ മാത്രമാണ് കളിച്ചിട്ടുള്ളത്. ഏകദിനത്തില്‍ ശ്രീലങ്ക, ന്യൂസിലാണ്ട് പരമ്പരകളിലും താരത്തിന് പരിക്ക് വില്ലനായി.
കഴിഞ്ഞ തവണ ഐപിഎലിന് തൊട്ടുമുമ്പും താരം പരിക്കിന് പിടിയിലായിരുന്നു. ലോകകപ്പിനിടയില്‍ താരത്തിന് പരിക്കേറ്റ് ചില മത്സരങ്ങള്‍ നഷ്ടമായിരുന്നു.
