ബിഗ് ബാഷിലെ എക്കാലത്തെയും ഉയര്‍ന്ന റണ്‍ സ്കോറര്‍ ആയ മൈക്കല്‍ ക്ലിംഗര്‍ ഇനി മുതല്‍ മെല്‍ബേണ്‍ റെനഗേഡ്സിന്റെ മുഖ്യ കോച്ച്. റെനഗേഡ്സ് കോച്ച് ആന്‍ഡ്രൂ മക്ഡൊണാള്‍ഡ് ജസ്റ്റിന്‍ ലാംഗറുടെ സഹ പരിശീലകനായി ഓസ്ട്രേലിയന്‍ ദേശീയ ടീമിലേക്ക് പോയതോടെയാണ് ഈ മാറ്റം.
കഴിഞ്ഞ സീസണില്‍ മൈക്കല്‍ ക്ലിംഗര്‍ ബിഗ് ബാഷില്‍ നിന്ന് വിരമിക്കുന്നതായി പ്രഖ്യാപിച്ചിരുന്നു. നിലവിലെ ചാമ്പ്യന്മാരായ മെല്‍ബേണ്‍ റെനഗേഡ്സിനൊപ്പം പ്രവര്‍ത്തിക്കുവാനുള്ള അവസരം ലഭിച്ചത് മികച്ച കാര്യമായാണ് താന്‍ വിലയിരുത്തുന്നതെന്ന് ക്ലിംഗര്‍ വ്യക്തമാക്കി.
ആന്‍ഡ്രൂ മക്ഡൊണാള്‍ഡ് മികച്ച ഒരു സംവിധാനം ആണ് റെനഗേഡ്സില്‍ നടപ്പിലാക്കിയിരിക്കുന്നതെന്നും തനിക്ക് അത് മുന്നോട്ട് കൊണ്ടുപോകാനാകുമെന്നുമാണ് കരുതുന്നതെന്നും ക്ലിംഗര്‍ അഭിപ്രായപ്പെട്ടു.
