താന്‍ ബിഗ് ബാഷിലേക്ക് വരുന്നത് തന്റെ അന്താരാഷ്ട്ര ക്രിക്കറ്റില്‍ നിന്നുള്ള വിരമിക്കലിന് ശേഷം മാത്രമാകുമെന്ന് അറിയിച്ച് ഓസ്ട്രേലിയന്‍ താരം ഡേവിഡ് വാര്‍ണര്‍. ബിഗ് ബാഷില്‍ നിന്ന് ഓസ്ട്രേലിയന്‍ മുന്‍ നിര താരങ്ങള്‍ പലപ്പോഴും വിട്ട് നില്‍ക്കുക പതിവാണ്. അതിന് പ്രധാന കാരണം അതേ സമയത്ത് ഓസ്ട്രേലിയന്‍ ബോര്‍ഡ് മറ്റു അന്താരാഷ്ട്ര പരമ്പരകള്‍ ഷെഡ്യൂള്‍ ചെയ്യുന്നു എന്നത് തന്നെയാണ്. ഇതോടെ ഓസ്ട്രേലിയയുടെ ദേശീയ താരങ്ങളുടെ സാന്നിദ്ധ്യം പലപ്പോഴും പല മത്സരങ്ങളും ഉണ്ടാകില്ല.
2013-14 സീസണ്‍ മുതല്‍ വാര്‍ണര്‍ ബിഗ് ബാഷില്‍ നിന്ന് വിട്ട് നില്‍ക്കുകയാണ്. ഓസ്ട്രേലിയയ്ക്കായി കളിക്കുമ്പോള്‍ തനിക്ക് ബിഗ് ബാഷിലും കളിക്കാനാകില്ല എന്നതാണ് സത്യമെന്നും വാര്‍ണര്‍ സൂചിപ്പിച്ചു. തന്റെ കുടുംബത്തിനൊപ്പം ചെലവഴിക്കുവാനും തനിക്ക് സമയം വേണമെന്നും വാര്‍ണര്‍ പറഞ്ഞു.
അതേ സമയം ഈ മുന്‍ നിര താരങ്ങളെല്ലാം ഐപിഎലില്‍ പങ്കെടുക്കുന്നുണ്ട്. ഇപ്പോള്‍ ബയോ ബബിളില്‍ കഴിയേണ്ടി വരുന്നു എന്നതും താരങ്ങളെ ടൂര്‍ണ്ണമെന്റുകളില്‍ നിന്ന് വിട്ട് നില്‍ക്കുവാന്‍ പ്രേരിപ്പിക്കുകയാണ്.
