നാളെ ആരംഭിക്കുന്ന ഇന്ത്യ – ഓസ്ട്രേലിയ ഏകദിന പരമ്പര ഓസ്ട്രേലിയ സ്വന്തമാക്കുമെന്ന് മുൻ ഓസ്‌ട്രേലിയൻ ക്യാപ്റ്റൻ റിക്കി പോണ്ടിങ്. 2-1ന് ഓസ്ട്രേലിയ പരമ്പര സ്വന്തമാക്കുമെന്ന് സോഷ്യൽ മീഡിയയിൽ താരം പറഞ്ഞു.
ലോകകപ്പിലെ മികച്ച പ്രകടനവും ടെസ്റ്റ് ക്രിക്കറ്റിൽ അടുത്തിടെ പുറത്തെടുത്ത പ്രകടനവും ഓസ്ട്രേലിയക്ക് മികച്ച ആത്മവിശ്വാസം നൽകുമെന്നും എന്നാൽ അവസാന ഏകദിന പരമ്പരയിൽ ഓസ്ട്രേലിയയോട് തോറ്റതിന് പ്രതികാരം തേടിയാവും ഇന്ത്യ ഇറങ്ങുകയെന്നും പോണ്ടിങ് പറഞ്ഞു. കഴിഞ്ഞ തവണത്തെ ഏകദിന പരമ്പര ആദ്യ രണ്ട് മത്സരങ്ങൾ ജയിച്ചതിന് ശേഷം ഇന്ത്യ 2-3ന് തോറ്റിരുന്നു.
നാളെ മുംബൈയിൽ വെച്ചാണ് മൂന്ന് മത്സരങ്ങളുള്ള ഏകദിന പരമ്പരയിലെ ആദ്യ മത്സരം. പാകിസ്ഥാനെയും ന്യൂസിലാൻഡിനെയും ടെസ്റ്റ് ക്രിക്കറ്റിൽ ഏകപക്ഷീയമായി തോൽപ്പിച്ചതിന് പിന്നാലെയാണ് ഓസ്ട്രേലിയ ഇന്ത്യയെ നേരിടാനിറങ്ങുന്നത്.
