ഇന്ത്യയ്ക്കായി രവിചന്ദ്രന്‍ അശ്വിനും രവീന്ദ്ര ജഡേജയും നൂറ് ടെസ്റ്റുകള്‍ കളിക്കുമെന്ന് അഭിപ്രായപ്പെട്ട് പാക് മുന്‍ സ്പിന്നര്‍ സഖ്ലൈന് മുഷ്താഖ്. ഇന്ത്യന്‍ സ്പിന്നര്‍മാരില്‍ പുതുമുഖ താരങ്ങള്‍ ഏറെ വന്നിട്ടുണ്ടെങ്കിലും സ്ഥിരതയാര്‍ന്ന പ്രകടനം ഇരുവരില്‍ നിന്നും വരുന്നുണ്ടെന്ന് സഖ്ലൈന് പറഞ്ഞു. ഇവര്‍ രണ്ട് പേരും ലോകോത്തര ബൗളര്‍മാരാണ്. രണ്ട് പേരും നൂറ് ടെസ്റ്റ് പൂര്‍ത്തിയാക്കുമെന്ന് തനിക്ക് തികഞ്ഞ ആത്മവിശ്വാസമുണ്ടെന്ന് സഖ്ലൈന് വ്യക്തമാക്കി.
71 ടെസ്റ്റില്‍ നിന്ന് അശ്വിന്‍ 365 വിക്കറ്റ് നേടിയപ്പോള്‍ 49 ടെസ്റ്റ് കളിച്ച ജഡേജയുടെ നേട്ടം 213 വിക്കറ്റാണ്. പ്രായവും ഇവര്‍ക്ക് അനുകൂലമാണെന്നും അതിനാല്‍ തന്നെ നൂറ് ടെസ്റ്റ് രണ്ട് താരങ്ങള്‍ക്കും കളിക്കാനാകുമെന്നും സഖ്ലൈന് വ്യക്തമാക്കി. പുതിയ ഇന്ത്യന്‍ സ്പിന്നര്‍മാരില്‍ താന്‍ ഉറ്റുനോക്കുന്ന മറ്റൊരു താരം കുല്‍ദീപ് യാദവാണഎന്നും സഖ്ലൈന് അഭിപ്രായപ്പെട്ടു.
