വിംബിൾഡൺ ക്വാർട്ടർ ഫൈനലിൽ നിലവിലെ ജേതാവും മൂന്നാം സീഡും ആയ ഏലേന റിബാക്കിനയും കഴിഞ്ഞ വർഷത്തെ ഫൈനലിസ്റ്റ് ആയ ആറാം സീഡ് ഒൻസ് യാബ്യുറും നേർക്കുനേർ വരും. ആറാം സീഡ് ആയ ഒൻസ് 2 തവണ വിംബിൾഡൺ ജേതാവ് ആയ ഒമ്പതാം സീഡ് പെട്ര ക്വിറ്റോവയെ 6-0, 6-3 എന്ന സ്കോറിന് തകർത്തു ആണ് അവസാന എട്ടിൽ സ്ഥാനം ഉറപ്പിച്ചത്.
വിംബിൾഡണിൽ മികവ് കാണിക്കുന്ന ക്വിറ്റോവയെ തീർത്തും തകർത്തു കളയുന്ന പ്രകടനം ആണ് ഒൻസ് പുറത്ത് എടുത്തത്. മത്സരത്തിൽ 6 തവണ ക്വിറ്റോവയുടെ സർവീസ് ഒൻസ് ബ്രേക്ക് ചെയ്തു. അതേസമയം എതിരാളിയായ 13 സീഡ് ബ്രസീലിയൻ താരം ബിയാട്രിസ് മയിയ പരിക്കേറ്റു കണ്ണീരോടെ പുറത്ത് പോയതോടെ ആണ് റിബാക്കിന അവസാന എട്ടിൽ സ്ഥാനം ഉറപ്പിച്ചത്. ആദ്യ സെറ്റിൽ 4-1 നു കസാഖ് താരം മുന്നിട്ട് നിൽക്കുമ്പോൾ ആണ് ബിയാട്രിസ് പിന്മാറിയത്. ക്വാർട്ടർ ഫൈനലിൽ ഒൻസ് കഴിഞ്ഞ ഫൈനലിന് പ്രതികാരം ചെയ്യുമോ അല്ല റിബാക്കിന ജയം തുടരുമോ എന്നു കണ്ടറിയാം.
