റോമിൽ റൂബ്ലേവ്, ഫോഗ്നിനി, റയോണിക് പുറത്ത്, ഷ്വാർട്ട്സ്മാനും ഷപോവലോവും മുന്നോട്ട്

എ. ടി. പി ടൂറിൽ റോം 1000 മാസ്റ്റേഴ്സ് ഓപ്പണിൽ അവസാന പതിനാറിലേക്ക് മുന്നേറി അർജന്റീനൻ താരവും എട്ടാം സീഡുമായ ഡീഗോ ഷ്വാർട്ട്സ്മാൻ. റോമിൽ മുൻ സെമിഫൈനലിസ്റ്റ് കൂടിയായ താരം ഓസ്‌ട്രേലിയൻ താരം ജോൺ മിൽമാനെ ആണ് മറികടന്നത്. ആദ്യ സെറ്റ് 6-4 നു നേടിയ ശേഷം രണ്ടാം സെറ്റിൽ ടൈബ്രേക്കറിലൂടെ ആയിരുന്നു ഷ്വാർട്ട്സ്മാന്റെ ജയം. സ്പാനിഷ് താരം പെഡ്രോ മാർട്ടിനസിനെ മറികടന്നു കനേഡിയൻ താരവും 12 സീഡുമായ ഡെന്നിസ് ഷപോവലോവും ടൂർണമെന്റിൽ മുന്നേറി. ആദ്യ സെറ്റ് 6-4 നു നേടിയ ശേഷം രണ്ടാം സെറ്റിൽ 3-0 ത്തിനു പിറകിൽ നിന്ന ശേഷം ആയിരുന്നു കനേഡിയൻ താരം 6-4 നു സെറ്റ് സ്വന്തമാക്കി മത്സരം കയ്യിലാക്കിയത്.

അതേസമയം ഏഴാം സീഡും ഇറ്റാലിയൻ താരവും ആയ ഫാബിയോ ഫോഗ്നിനി ടൂർണമെന്റിൽ നിന്നു പുറത്തായി.
സീഡ് ചെയ്യാത്ത ഫ്രഞ്ച് താരം ഉഗോ ഹമ്പർട്ടിനോട് 7-5, 7-6 എന്ന നേരിട്ടുള്ള സെറ്റുകൾക്ക് ആണ് ഇറ്റാലിയൻ താരം തോൽവി വഴങ്ങിയത്. ഹുബർട്ട് ഹുർകാസിനോട് മൂന്നു സെറ്റ് പോരാട്ടത്തിൽ ആണ് ഒമ്പതാം സീഡ് റഷ്യൻ താരം ആന്ദ്ര റൂബ്ലേവ് തോൽവി വഴങ്ങിയത്. 7-6, 3-6, 6-2 എന്ന സ്കോറിന് ആയിരുന്നു റൂബ്ലേവിന്റെ തോൽവി. ക്രൊയേഷ്യൻ താരം തുസാൻ ലജോവിച്ചിനോട് തോറ്റ പതിമൂന്നാം സീഡ് കാനഡയുടെ മിലോസ് റയോണിക്കും ടൂർണമെന്റിൽ നിന്നു പുറത്തായി. 7-6, 4-6, 6-2 എന്ന സ്കോറിന് ആയിരുന്നു റയോണിക്ക് തോൽവി വഴങ്ങിയത്.