Tag: Zinchenko

വലിയ കിരീടങ്ങൾ ലക്ഷ്യം വക്കുന്നില്ല എന്ന ആഴ്‌സണൽ ചീത്തപ്പേര് മാറ്റാൻ ആണ് തങ്ങളുടെ ശ്രമം എന്നു വ്യക്തമാക്കി ഒലക്സാണ്ടർ സിഞ്ചെങ്കോ. ആദ്യ നാലിനും ചാമ്പ്യൻസ് ലീഗ് യോഗ്യതക്ക് വേണ്ടിയും കളിക്കുന്നവർ എന്ന ആഴ്‌സണലിന് എതിരായ വിമർശനം തകർക്കണം എന്നു പറഞ്ഞ യുക്രൈൻ താരം അതിനു മുകളിൽ വലിയ കിരീടങ്ങൾ ക്ലബ് ലക്ഷ്യം വക്കണം എന്നും കൂട്ടിച്ചേർത്തു.

എപ്പോഴും കേൾക്കുന്ന ഈ വിമർശനത്തിന് അന്ത്യം കുറിക്കണം എന്നു പറഞ്ഞ സിഞ്ചെങ്കോ ആഴ്‌സണൽ താരങ്ങളും ആരാധകരും അതിനു മുകളിൽ അർഹിക്കുന്നു എന്നും വ്യക്തമാക്കി. മാഞ്ചസ്റ്റർ സിറ്റി മികച്ചവർ ആണെന്ന് സമ്മതിച്ച താരം പക്ഷെ പ്രീമിയർ ലീഗ് കിരീടത്തിനു ആയി അവസാനം വരെ ആഴ്‌സണൽ പൊരുതും എന്നും പറഞ്ഞു. ഫുട്‌ബോളിൽ ഒന്നും പ്രവചിക്കാൻ ആവില്ല എന്നതിനാൽ ഘട്ടം ഘട്ടം ആയി മുന്നേറാൻ ആണ് തങ്ങളുടെ ശ്രമം എന്നും താരം പറഞ്ഞു. മാഞ്ചസ്റ്റർ സിറ്റിയിൽ നാലു ലീഗ് കിരീടങ്ങൾ നേടിയ ശേഷമാണ് താരം ആഴ്‌സണലിൽ ഈ സീസണിൽ എത്തിയത്.

ആഴ്‌സണലിന് വലിയ ആശ്വാസവും ആത്മവിശ്വാസവും പകർന്നു പരിക്ക് മാറി എത്തിയ ബുകയോ സാക, ഒലക്‌സാണ്ടർ സിഞ്ചെങ്കോ എന്നിവർ പരിശീലനത്തിൽ ഏർപ്പെട്ടു. പ്രീമിയർ ലീഗിൽ കഴിഞ്ഞ നോട്ടിങ്ഹാം ഫോറസ്റ്റിന് എതിരായ മത്സരത്തിൽ ആണ് സാകക്ക് പരിക്കേറ്റത്. എന്നാൽ പരിക്ക് ഗുരുത്തരമല്ലാത്തതിനാൽ സാക ഇന്ന് പരിശീലനത്തിൽ ഏർപ്പെടുക ആയിരുന്നു. ചെൽസിക്ക് എതിരായ ലണ്ടൻ ഡാർബിക്ക് മുമ്പ് ആഴ്‌സണലിന് ഇത് വലിയ കരുത്ത് പകരും.

അതേസമയം മുമ്പ് പരിശീലനത്തിന് ഇടയിൽ പരിക്കേറ്റ സിഞ്ചെങ്കോയുടെ അഭാവം കുറെ മത്സരങ്ങളിലായി ആഴ്‌സണലിന് പ്രശ്നങ്ങൾ സൃഷ്ടിച്ചിരുന്നു. അതിനാൽ തന്നെ താരത്തിന്റെ തിരിച്ചു വരവ് വലിയ കരുത്ത് ആവും ആഴ്‌സണലിന് പകരുക. പരിക്ക് മാറി മുഹമ്മദ് എൽനെനിയും നേരത്തെ പരിശീലനത്തിൽ ഏർപ്പെട്ടിരുന്നു. നിലവിൽ എമിൽ സ്മിത് റോ, മാറ്റ് ടർണർ എന്നിവർ ഒഴിച്ചു ബാക്കിയുള്ള മുഴുവൻ താരങ്ങളും പരിക്കിൽ നിന്നു മുക്തമായത് ആഴ്‌സണലിന് വലിയ ആത്മവിശ്വാസം ആണ് നൽകുക. നിലവിൽ ഇന്നത്തെ യൂറോപ്പ ലീഗ് മത്സരത്തിന് ശേഷം ലോകകപ്പ് തുടങ്ങുന്നതിനു മുമ്പ്‌ ചെൽസി, വോൾവ്സ് എന്നിവർക്ക് എതിരായ പ്രീമിയർ ലീഗ് മത്സരങ്ങളും ബ്രൈറ്റണിനു എതിരായ ലീഗ് കപ്പ് മത്സരവും ആണ് ആഴ്‌സണലിന് കളിക്കാൻ ബാക്കിയുള്ള മത്സരങ്ങൾ.