പ്രൊ കബഡി ലീഗില്‍ വീണ്ടുമൊരു സമനില കൂടി. പൂനെയും മുംബൈയും ഏറ്റുമുട്ടിയപ്പോള്‍ സമനിലയില്‍ പിരിഞ്ഞ അതേ സ്കോര്‍ ലൈനിലാണ് ഇന്ന് ദബാംഗ് ഡല്‍ഹിയും ഗുജറാത്ത് ഫോര്‍ച്യൂണ്‍ ജയന്റ്സും സമനിലയില്‍ പിരിഞ്ഞത്. മത്സരത്തിന്റെ അവസാന ഘട്ടത്തിലാണ് ദബാംഗ് ഡല്‍ഹി മത്സരത്തിലേക്ക് തിരിച്ചുവരവ് നടത്തുന്നത്. മത്സരം അവസാനിക്കുവാന്‍ ആറ് മിനുട്ട് മാത്രം അവശേഷിക്കെ 28-21 ന്റെ ലീഡ് ഗുജറാത്തിനായിരുന്നുവെങ്കിലും പൊരുതിക്കയറിയ ഡല്‍ഹി അവസാന മിനുട്ടില്‍ 32-31ന്റെ ലീഡ് നേടിയെങ്കിലും ഗുജറാത്ത് പോയിന്റ് നേടി മത്സരം സമനിലയിലാക്കുകയായിരുന്നു. ആധിപത്യം പുലര്‍ത്തിയ മത്സരം അവസാന സെക്കന്‍ഡില്‍ കൈവിടുന്ന സ്ഥിതിയില്‍ നിന്നാണ് ഗുജറാത്തിനു ആശ്വാസ സമനില കൈവരിക്കാനായത്.
റെയിഡിംഗില്‍ ദബാംഗ് ഡല്‍ഹിയും(19-17) ടാക്കിള്‍ പോയിന്റുകളില്‍ ഗുജറാത്ത് ലയണ്‍സും ആണ് മുന്നില്‍ നിന്നത്(11-10). ഇരു ടീമുകളും ഓരോ തവണ ഓള്‍ഔട്ട് ആയപ്പോള്‍ ഗുജറാത്ത് രണ്ട് അധിക പോയിന്റുകളും ഡല്‍ഹി ഒരു പോയിന്റും നേടി.
