ഇത് ചരിത്രം, എൽദോസ് പോള്‍ ലോക അത്‍ലറ്റിക്സ് ചാമ്പ്യന്‍ഷിപ്പ്സിലെ ട്രിപ്പിള്‍ ജംപ് ഫൈനലിന് യോഗ്യത നേടുന്ന ആദ്യ ഇന്ത്യന്‍ താരം

ലോക അത്‍ലറ്റിക്സ് ചാമ്പ്യന്‍ഷിപ്പ്സ് ട്രിപ്പിള്‍ ജംപിൽ ഫൈനലിലേക്ക് യോഗ്യത നേടി ഇന്ത്യയുടെ എൽദോസ് പോള്‍. ലോക ചാമ്പ്യന്‍ഷിപ്പിൽ ഈ മത്സരയിനത്തിൽ ഫൈനലില്‍ കടക്കുന്ന ആദ്യ ഇന്ത്യന്‍ താരം കൂടിയാണ് എൽദോസ്. 16.68 മീറ്റര്‍ ദൂരം താണ്ടിയ എൽദോസ് യോഗ്യത റൗണ്ടിൽ 12ാമനായി ആണ് അവസാനിച്ചത്. 12 പേര്‍ക്കാണ് ഫൈനലിലേക്ക് യോഗ്യത ലഭിച്ചത്. ഞായറാഴ്ച രാവിലെ 6.30ന് ആണ് ഫൈനൽ നടക്കുന്നത്.

നേരിട്ടുള്ള യോഗ്യതയ്ക്ക് 17.05 മീറ്റര്‍ ദൂരം ആയിരുന്നു താരങ്ങള്‍ ചാടേണ്ടിയിരുന്നത്. മറ്റു ഇന്ത്യന്‍ താരങ്ങളായ അബ്ദുള്ള അബൂബക്കര്‍ 16.45 മീറ്ററും പ്രവീൺ ചിത്രവേൽ 16.30 മീറ്ററും ആണ് ചാടിയത്.