പൂള്‍ എ യില്‍ ഇന്ന് നടന്ന രണ്ടാം മത്സരത്തില്‍ വിജയികളായി ന്യൂസിലാണ്ട്. ഫ്രാന്‍സിനെതിരെ മത്സരത്തില്‍ 2-0നു ജയിക്കേണ്ടിയിരുന്ന ന്യൂസിലാണ്ട് അവസാന മിനുട്ടിലാണ് ഒരു ഗോള്‍ വഴങ്ങിയത്. അതോടെ 2-1 എന്ന മാര്‍ജിനിലായി ന്യൂസിലാണ്ടിന്റെ ജയം. ഗോള്‍രഹിത ആദ്യ ക്വാര്‍ട്ടറിനു ശേഷം 16ാം മിനുട്ടില്‍ കെയിന്‍ റസ്സലിലൂടെ ന്യൂസിലാണ്ട് ലീഡ് നേടി. ആദ്യ പകുതിയില്‍ 1-0നു ന്യൂസിലാണ്ടായിരുന്നു മുന്നില്‍.
രണ്ടാം പകുതിയിലും ഏറെ സമയം ഇരു ടീമുകള്‍ക്കും ഗോളുകള്‍ നേടാനാകാതെ മത്സരം നീങ്ങിയപ്പോള്‍ 56ാം മിനുട്ടില്‍ സ്റ്റീഫന്‍ ജെന്നെസ്സ് ന്യൂസിലാണ്ടിനെ 2-0 ലീഡിലേക്ക് നയിച്ചു. മത്സരത്തിന്റെ അവസാന നിമിഷത്തില്‍ വിക്ടര്‍ ചാര്‍ലെറ്റ് ഫ്രാന്‍സിനായി പെനാള്‍ട്ടി കോര്‍ണറിലൂടെ ആശ്വാസ ഗോള്‍ നേടി. ന്യൂസിലാണ്ടിന്റെ രണ്ട് ഗോളുകളും ഫീല്‍ഡ് ഗോളുകളായിരുന്നു.
