2025-ലെ ജൂനിയർ വനിതാ ഹോക്കി ലോകകപ്പിൽ നമീബിയയെ 13-0 എന്ന കൂറ്റൻ സ്കോറിന് തകർത്ത് ഇന്ത്യൻ ജൂനിയർ വനിതാ ഹോക്കി ടീം തകർപ്പൻ തുടക്കം കുറിച്ചു. ഹിനാ ബാനുവും കനിക സിവാച്ചും ഹാട്രിക്ക് നേടിയ പ്രകടനമാണ് മത്സരത്തിലെ പ്രധാന ആകർഷണം. ടൂർണമെന്റിൽ ഇന്ത്യയുടെ എക്കാലത്തെയും വലിയ വിജയം കൂടിയാണിത്. ഈ തകർപ്പൻ വിജയത്തോടെ ഇന്ത്യ ഗ്രൂപ്പ് നിലയിൽ ഒന്നാം സ്ഥാനത്തെത്തി.
മത്സരത്തിന്റെ തുടക്കം മുതൽ ഇന്ത്യ ആധിപത്യം പുലർത്തി. ആദ്യ ക്വാർട്ടറിൽ നാല് മിനിറ്റിനുള്ളിൽ നാല് ഗോളുകൾ നേടി ഇന്ത്യ മുന്നേറ്റം തുടങ്ങി. ഹിന ബാനുവിനും കനിക സിവാച്ചിനും പുറമെ സാക്ഷി റാണ രണ്ട് ഗോളുകൾ നേടി ടീമിന്റെ വിജയത്തിൽ പങ്കാളിയായി. ബിനിമ ധൻ, സോനം, സാക്ഷി ശുക്ല, ഇഷിക, മനീഷ എന്നിവരും ഗോളുകൾ സ്വന്തമാക്കി.
