സൂപ്പർ കപ്പിലെ അവസാന മത്സരത്തിൽ കേരള ബ്ലാസ്റ്റേഴ്സിന് വലിയ പരാജയം. ഇന്ന് നോർത്ത് ഈസ്റ്റ് യുണൈറ്റഡിനെ നേരിട്ട കേരള ബ്ലാസ്റ്റേഴ്സ് ഒന്നിനെതിരെ നാലു ഗോളുകളുടെ വലിയ പരാജയമാണ് വഴങ്ങേണ്ടി വന്നത്. ശക്തമായ ടീമിനെ തന്നെ ബ്ലാസ്റ്റേഴ്സ് ഇറക്കിയെങ്കിലും ഇന്ന് ടീമിൽ നിന്ന് ശക്തമായ പോരാട്ടം കാണാനായില്ല. തുടക്കം മുതൽ കേരള ബ്ലാസ്റ്റേഴ്സ് അവരുടെ പതിവ് താളം കണ്ടെത്താനാവാതെ വിഷമിക്കുന്നതാണ് കണ്ടത്. രണ്ടാം മിനിറ്റിൽ തന്നെ ഇന്ന് നോർത്ത് ഈസ്റ്റ് യൂണിറ്റ് എടുത്തു. യുവതാരം പാർതിബ് ഗൊഗോയിയാണ് നോർത്ത് ഈസ്റ്റിന് ലീഡ് നൽകിയത്. ഈ ലീഡ് അവർ ആദ്യ പകുതിയുടെ അവസാനം വരെ കാത്തു സൂക്ഷിച്ചു.
രണ്ടാമത്തേതിൽ കേരള ബ്ലാസ്റ്റേഴ്സ് ചില മാറ്റങ്ങൾ വരുത്തിയെങ്കിലും അത് കളി മെച്ചപ്പെടുത്തിയില്ല. പിന്നീട് നോർത്ത് ഈസ്റ്റിന്റെ ആധിപത്യമാണ് കാണാനായത്. 68 മിനിറ്റിൽ മുഹമ്മദലി ബമാമർ ഒരു ഫ്രീകിക്കിലൂടെ നോർത്ത് ഈസ്റ്റിന്റെ ലീഡ് ഇരട്ടിയാക്കി. പിന്നാലെ ഒരു ഗോൾ നേടി ദിമി കേരള ബ്ലാസ്റ്റേഴ്സിന് പ്രതീക്ഷ നൽകിയെങ്കിലും അത് നീണ്ടു നിന്നില്ല. 75ആം മിനിറ്റിൽ റെദീം തലാങ്കും 80ആം മിനിറ്റിൽ മലയാളി താരം ജിതിൻ എംഎസും ഗോൾ നേടിയതോടെ നോർത്ത് ഈസ്റ്റിന്റെ വിജയം പൂർത്തിയായി.
നോർത്ത് 6 പോയിന്റുമായി ഗ്രൂപ്പിൽ രണ്ടാമത് ഫിനിഷ് ചെയ്തു. 2 മത്സരം തോറ്റ ബ്ലാസ്റ്റേഴ്സ് മൂന്നാം സ്ഥാനത്തും ഫിനിഷ് ചെയ്തു.
