ഇംഗ്ലീഷ് പ്രീമിയർ ലീഗിൽ കിരീട പോരാട്ടത്തിൽ വിട്ട് കൊടുക്കാതെ പൊരുതുന്ന ആഴ്‌സണലിന് വലിയ തിരിച്ചടിയായി പ്രതിരോധ താരങ്ങളുടെ പരിക്ക്. സീസണിൽ ഇനി 3 മത്സരങ്ങൾ അവശേഷിക്കുന്ന സമയത്ത് പ്രതിരോധ താരങ്ങൾ ആയ വില്യം സലിബയും ഒലക്സാണ്ടർ സിഞ്ചെങ്കോയും ഇനി സീസണിൽ കളിക്കില്ല എന്നുറപ്പായി. നിലവിൽ മാഞ്ചസ്റ്റർ സിറ്റിയെക്കാൾ ഒരു പോയിന്റ് പിറകിലുള്ള ആഴ്‌സണലിന് ഇത് വലിയ തിരിച്ചടിയാണ്.
നേരത്തെ യൂറോപ്പ ലീഗ് രണ്ടാം പാദ ക്വാർട്ടർ ഫൈനലിൽ സ്പോർട്ടിങ് ലിസ്ബണിനു എതിരെ പരിക്കേറ്റ സലിബ അതിനു ശേഷം ഇത് വരെ സീസണിൽ കളിച്ചിട്ടില്ല. അതേസമയം കഴിഞ്ഞ മത്സരത്തിൽ ന്യൂകാസ്റ്റിലിന് എതിരെ സംഭവിച്ച പരിക്ക് ആണ് സിഞ്ചെങ്കോക്ക് വിനയായത്. തുടർന്ന് പിൻവലിക്കപ്പെട്ട താരം സീസണിൽ ഇനി കളിക്കില്ല എന്നു സ്ഥിരീകരിക്കപ്പെടുക ആയിരുന്നു. എന്നാൽ താരങ്ങൾക്ക് ശസ്ത്രക്രിയ വേണ്ടി വരില്ല എന്നത് ആഴ്‌സണലിന് ആശ്വാസ വാർത്തയാണ്.
