ലീഡ്സ് യുണൈറ്റഡിന് എതിരായ മത്സരത്തിൽ ഹാംസ്ട്രിങിന് പരിക്കേറ്റ ബുകയോ സാകയുടെ പരിക്ക് ഗുരുതരമല്ലെന്നു റിപ്പോർട്ട്. ആദ്യം പരിക്ക് ഗുരുതരമാവുമോ എന്നു പേടിച്ച ആഴ്‌സണലിന് ഇത് നല്ല വാർത്ത തന്നെയാണ്. മൂന്നു മുതൽ നാലു ആഴ്ചത്തേക്ക് സാക പുറത്തിരിക്കും എന്നാണ് റിപ്പോർട്ട്. ഇതോടെ ആഴ്‌സണലിന്റെ ആൻഫീൽഡിൽ ലിവർപൂളിന് എതിരായ അടുത്ത മത്സരം സാകക്ക് നഷ്ടമാകും.
അതിനു ശേഷം ഇന്റർനാഷണൽ ബ്രേക്ക് ആയതിനാൽ ഇംഗ്ലണ്ടിന്റെ മത്സരങ്ങളും സാകക്ക് നഷ്ടമാകും. അതിനു ശേഷം നോട്ടിങ്ഹാം ഫോറസ്റ്റിന് എതിരെയോ മാഞ്ചസ്റ്റർ സിറ്റിക്ക് എതിരെയോ സാക തിരിച്ചെത്താൻ ആണ് സാധ്യത. അതേസമയം ഇതേ മത്സരത്തിൽ തന്നെ ഷോൾഡറിന് പരിക്കേറ്റ ആഴ്‌സണൽ ക്യാപ്റ്റൻ മാർട്ടിൻ ഒഡഗാർഡിന്റെ പരിക്കും ഗുരുതരമല്ല. അടുത്ത ലിവർപൂൾ മത്സരത്തിൽ തന്നെ ഒഡഗാർഡ് ടീമിൽ തിരിച്ചെത്തിയേക്കും എന്നാണ് സൂചന.
