ഇംഗ്ലീഷ് പ്രീമിയർ ലീഗ് ക്ലബ്ബ് സൗത്താംപ്ടൻ പുതിയ പരിശീലകനെ പ്രഖ്യാപിച്ചു. മുൻ ലേയ്പ്സിഗ് പരിശീലകൻ റാൾഫ് ഹാസൻഹട്ടിൽ ആണ് ഇനി സെയിന്റ്സിനെ നയിക്കുക. തിങ്കളാഴ്ച്ച പുറത്താക്കപ്പെട്ട മാർക് ഹ്യുജ്സിന് പകരകാരനായാണ്‌ ഹാസൻഹട്ടിൽ എത്തുന്നത്.
മെയ് മാസത്തിൽ ലേയ്പ്സിഗ് വിട്ട ശേഷമുള്ള 51 വയുസ്സുകാരൻ ഹാസൻഹട്ടിലിന്റെ ആദ്യ ജോലിയാണ് ഇത്. ഓസ്ട്രിയക്കാരനായ ഹാസൻഹട്ടിൽ 2016 മുതൽ 2018 വരെ ലെപ്സിഗ് പരിശീലകനായിരുന്നു. ജർമ്മൻ ലീഗിൽ അരങ്ങേറ്റത്തിൽ തന്നെ രണ്ടാം സ്ഥാനത്ത് എത്താൻ അദ്ദേഹത്തിന്റെ ടീമിന് ആയിരുന്നു. നിലവിൽ പ്രീമിയർ ലീഗിൽ 18 ആം സ്ഥാനത്തുള്ള സൗത്താംപ്ടനെ തരം താഴ്ത്തലിൽ നിന്ന് രക്ഷപെടുത്തുക എന്ന വലിയ ജോലിയാണ് അദേഹത്തിന് മുന്നിലുള്ളത്.
