മൗറീഞ്ഞോ സന്ദർശിക്കാൻ ഏറ്റവും വെറുക്കുന്ന പ്രീമിയർ ലീഗ് ഗ്രൗണ്ട് ഏതെന്ന് ചോദിച്ചാൽ അതിന് ഒരൊറ്റ ഉത്തരമേ കാണൂ- സെന്റ് ജെയിംസ് പാർക്ക്. ന്യൂ കാസിലിന്റെ മൈതാനത്തേക്ക് സ്വന്തം ടീമുമായി പോയപ്പോയൊക്കെ മൗറീഞ്ഞോക്ക് തിരിച്ചടികൾ മാത്രം നേരിടേണ്ടി വന്ന മൈതാനം. ഇന്നലെയും അതിന് മാറ്റം ഉണ്ടായില്ല. റെലഗേഷൻ ഭീഷണിക്ക് തൊട്ടരികിൽ നിൽകുന്ന ബെനീറ്റസിന്റെ ടീമിനെ തന്റെ താര സമ്പന്നമായ യൂണൈറ്റഡ് ടീമുമായി ചെന്നപ്പോഴും മൗറീഞ്ഞോക്ക് എതിരില്ലാത്ത 1 ഗോളിന് തോൽകാനായിരുന്നു വിധി.
തന്റെ പ്രീമിയർ ലീഗ് കരിയറിൽ 7 തവണ സെന്റ് ജെയിംസ് പാർക്കിൽ ചെന്ന മൗറീഞ്ഞോ ഒരിക്കൽ പോലും ഇവിടെ ജയിച്ചിട്ടില്ല. 4 തോൽവിയും 3 സമനിലയുമാണ് പോർച്ചുഗീസുകാൻറെ സമ്പാദ്യം. ഇന്നലത്തെ തോൽവിയോടെ ബെനീറ്റസിന്റെ മൗറീഞ്ഞോക്കെതിരായ റെക്കോർഡും മെച്ചപ്പെട്ടു. ബെനീറ്റസിനെതിരെ ആറ് മത്സരങ്ങളിലാണ് മൗറീഞ്ഞോ ഇതുവരെ തോൽവി അറിഞ്ഞത്. 9 മത്സരങ്ങൾ മൗറീഞ്ഞോ ടീമിനെതിരെ ജയിച്ച പെപ് ഗാർഡിയോള മാത്രമാണ് ഇതിൽ ബെനീറ്റസിന്റെ മുൻപിൽ ഉള്ളത്.
പ്രീമിയർ ലീഗിൽ സെന്റ് ജെയിംസ് പാർക്കിൽ ജയിക്കാൻ ആയിട്ടില്ലെങ്കിലും ലീഗ് കപ്പിൽ രണ്ട് തവണ അവിടെ ജയിക്കാൻ മൗറീഞ്ഞോക്ക് ആയിട്ടുണ്ട്.
കൂടുതൽ കായിക വാർത്തകൾക്ക് : www.facebook.com/FanportOfficial
