ഇംഗ്ലീഷ് പ്രീമിയർ ലീഗിൽ മാഞ്ചസ്റ്റർ സിറ്റിയെ ഇത്തിഹാദിൽ ചെന്ന് സമനിലയിൽ പിടിച്ച് ലിവർപൂൾ. സിറ്റിയുടെ ഹോം ഗ്രൗണ്ടിൽ നടന്ന മത്സരത്തിൽ 1-1ന്റെ ആവേശകരമായ സമനില ആണ് പിറന്നത്. മത്സരം അവസാനിക്കാൻ 10 മിനുട്ട് മാത്രം ബാക്കി ഇരിക്കെ ട്രെന്റ് അലക്സാണ്ടർ അർനോൾഡ് ആണ് ലിവർപൂളിന് സമനില നൽകിയത്.
ലീഗിലെ ആദ്യ രണ്ടു സ്ഥാനക്കാർ തമ്മിൽ നടന്ന പോരാട്ടത്തിൽ ഇരു ടീമുകളും കരുതലോടെയാണ് തുടങ്ങിയത്. എർലിംഗ് ഹാളണ്ടാണ് മാഞ്ചസ്റ്റർ സിറ്റിക്ക് ലീഡ് നൽകിയത്. 27ആം മിനുട്ടിൽ നഥാൻ അകെയുടെ പാസ് സ്വീകരിച്ച് എർലിംഗ് ഹാളണ്ടാണ് സിറ്റിക്ക് ലീഡ് നൽകിയത്. ഇംഗ്ലീഷ് പ്രീമിയർ ലീഗിലെ ഹാളണ്ടിന്റെ അമ്പതാം ഗോളായിരുന്നു ഇത്‌.
രണ്ടാം പകുതിയിൽ ലിവർപൂൾ തിരിച്ചടിക്കാൻ ശ്രമിച്ചു കൊണ്ടിരുന്നു. അവസാനം 80ആം മിനുട്ടിൽ അർനോൾഡിലൂടെ അവർ സമനില കണ്ടെത്തി. ഈ ഫലത്തോടെ മാഞ്ചസ്റ്റർ സിറ്റി 29 പോയിന്റുമായി ഒന്നാമതും 28 പോയിന്റുമായി ലിവർപൂൾ രണ്ടാമതും നിൽക്കുന്നു.
