സീസണിലെ ആദ്യ മത്സരത്തിൽ വോൾവ്സിനെതിരെ വിജയം നേടി ലീഡ്സ് യുനൈറ്റഡ്. തങ്ങളുടെ ഹോം ഗ്രൗണ്ടിൽ വെച്ചു നടന്ന മത്സരത്തിൽ ഒന്നിനെതിരെ രണ്ടു ഗോളുകൾക്കാണ് ലീഡ്സ് വിജയം നേടിയത്. ലീഡ്സിന് വേണ്ടി റോഡ്രിഗോ സ്‌കോർ ചെയ്തപ്പോൾ രണ്ടാം ഗോൾ റയാൻ അറ്റ് നൂരിയുടെ പേരിൽ സെൽഫ് ഗോൾ ആയി കുറിച്ചു. വോൾവ്സിന്റെ ഗോൾ പോഡൻസ് ആണ് നേടിയത്.
സീസണിലെ ആദ്യ മത്സരത്തിലിറങ്ങിയ ടീമുകൾ അക്രമണത്തിൽ ഊന്നി തന്നെയാണ് കളിച്ചത്‌. ആറാം മിനിറ്റിൽ തന്നെ പോഡൻസ് നേടിയ ഗോളിൽ വോൾവ്സ് മുന്നിലെത്തി. ഇടത് വിങ്ങിലേക്ക് റൂബെൻ നവാസ് നൽകിയ ബോൾ നെറ്റോ ബോസിലേക്ക് നീട്ടി നൽകി. ഹ്വാങ് ഹെഡ് ചെയ്തു ഇട്ട ബോൾ പോസ്റ്റിന് നേരെ മുന്നിൽ നിന്ന പോഡൻസ് ഫിനിഷ് ചെയ്തു. ഇരുപത്തിനാലാം മിനിറ്റിൽ ലീഡ്സിന്റെ സമനില ഗോൾ എത്തി. ബോക്സിന്റെ വലത് ഭാഗത്തും നിന്നും പ്രതിരോധ താരങ്ങളെ വെട്ടിച്ചു റോഡ്രിഗോ നേടിയ ഷോട്ട് ഗോളിയെയും കടന്ന് വലയിലെത്തി. എഴുപത്തി നാലാം മിനിറ്റിൽ ആണ് ലീഡ്സ് കാത്തിരുന്ന വിജയ ഗോൾ എത്തിയത്. കൗണ്ടർ വഴി എത്തിയ ബോൾ ഇടത് വിങ് വഴി ബംഫോർഡ് നിലം പറ്റെ ക്രോസ് നൽകിയപ്പോൾ ഓടിയെത്തിയ ആരോൺസൻ വളയിലെത്തിക്കാൻ കാല് നീട്ടി. പക്ഷെ താരത്തെ മാർക്ക് ചെയ്യാൻ ഒപ്പം നിന്ന വോൾവ്സ് പ്രതിരോധ താരം റയാന്റെ കാലുകളിൽ തട്ടി പന്ത് വലയിൽ തന്നെ എത്തി. ആദ്യം ആരോൺസനിന്റെ പേരിൽ കുറിച്ച ഗോൾ പിന്നീട് സെല്ഫ് ഗോൾ ആയി രേഖപ്പെടുത്തി.
ഇതോടെ ആദ്യ മത്സരത്തിൽ തന്നെ വിജയം നേടി പുതിയ സീസണിന് തുടക്കം കുറിക്കാൻ ലീഡ്സിനായി. കൂടുതൽ സമയം പന്ത് കൈവശം വെച്ചെങ്കിലും വോൾവ്സിന് തോൽവിയോടെ സീസൺ ആരംഭിക്കേണ്ടിയും വന്നു.
Story Highlight: FULL-TIME Leeds 2-1 Wolves
Leeds start the season with victory after fighting back from a goal down
#LEEWOL
