വമ്പന്മാരെ വീഴ്ത്തി ഹോളണ്ടിനെ ലോക ഫുട്‌ബോളിൽ വീണ്ടും ചർച്ചയാക്കിയ അയാക്സിന് ഡച് ഫുട്‌ബോൾ അസോസിയേഷന്റെ സമ്മാനം. ടോട്ടൻഹാമിനെ നേരിടും മുൻപുള്ള അവരുടെ ലീഗ് മത്സരങ്ങൾ നീട്ടി വച്ചാണ് ഹോളണ്ട് എഫ് എ അയാക്സിന് സഹായം ഒരുക്കുന്നത്. ഈ മാസം 30 നാണ് സ്പർസ്- അയാക്‌സ് ചാമ്പ്യൻസ് ലീഗ് സെമി ആദ്യ പാദ മത്സരം ലണ്ടനിൽ അരങ്ങേറുന്നത്.
ഏപ്രിൽ 28 ന് നടക്കേണ്ട ഗ്രാഫ്ഷാപ്പിനെതിരായ മത്സരമാണ് നീട്ടി വച്ചത്. ഇതോടെ ഈ മാസം 23 ന് വിറ്റസെയെ നേരിടുന്ന അവർക്ക് പിന്നീടുള്ള 7 ദിവസങ്ങൾ വിശ്രമം ലഭിക്കും. അയാക്സിനെ സഹായിക്കുക എന്നതിന് അപ്പുറം കളിക്കാരുടെ ഫിറ്റ്നസിനെ കുറിച്ചുള്ള ആശങ്കയാണ് ഇത്തരം ഒരു തീരുമാനത്തിൽ എത്തിച്ചത് എന്നാണ് ഡച്ച് എഫ് എ യുടെ ഔദ്യോഗിക വിശദീകരണം.
