മാഞ്ചസ്റ്റർ യുണൈറ്റഡ് കടുത്ത പ്രതിഷേധത്തിൽ; റഫറിയിംഗിലെ പിഴവുകൾക്കെതിരെ ഔദ്യോഗിക പരാതി

ബോൺമൗത്തിനെതിരായ മത്സരത്തിൽ 2-2 എന്ന നിലയിൽ സമനില വഴങ്ങിയതിന് പിന്നാലെ, റഫറിയിംഗിലെ ഗുരുതരമായ പിഴവുകൾക്കെതിരെ പി.ജി.എം.ഒ.എല്ലിന് (PGMOL) ഔദ്യോഗിക പരാതി നൽകാനൊരുങ്ങി മാഞ്ചസ്റ്റർ യുണൈറ്റഡ്. മത്സരത്തിനിടെ അമദ് ഡിയാലോയെ ബോക്സിനുള്ളിൽ വെച്ച് ബോൺമൗത്ത് പ്രതിരോധ താരം അഡ്രിയാൻ ട്രഫർട്ട് രണ്ടു കൈകൾ കൊണ്ടും തടഞ്ഞുവച്ചെങ്കിലും റഫറി സ്റ്റുവർട്ട് ആറ്റ്‌വെൽ പെനാൽറ്റി നിഷേധിച്ചതാണ് ക്ലബ്ബിനെ ചൊടിപ്പിച്ചത്. സമാനമായ ഒരു സാഹചര്യത്തിൽ ബോൺമൗത്തിന് അനുകൂലമായി പെനാൽറ്റി നൽകുകയും ഹാരി മഗ്വയറിന് ചുവപ്പ് കാർഡ് ലഭിക്കുകയും ചെയ്ത പശ്ചാത്തലത്തിൽ, റഫറിയുടെ ഈ ഇരട്ടത്താപ്പ് അംഗീകരിക്കാനാവില്ലെന്നാണ് യുണൈറ്റഡിന്റെ നിലപാട്.

ഇടക്കാല പരിശീലകൻ മൈക്കൽ കാരിക് റഫറിയുടെ തീരുമാനത്തെ “അവിശ്വസനീയം” എന്നും “ഭ്രാന്തമായ നടപടി” എന്നുമാണ് വിശേഷിപ്പിച്ചത്. ഒരേപോലെയുള്ള രണ്ട് ഫൗളുകൾക്ക് രണ്ട് വ്യത്യസ്ത തീരുമാനങ്ങൾ എടുത്തത് അംഗീകരിക്കാനാവില്ലെന്ന് അദ്ദേഹം വ്യക്തമാക്കി. ഈ സീസണിലുടനീളം വാർ (VAR) തീരുമാനങ്ങൾ യുണൈറ്റഡിന് തിരിച്ചടിയാകുന്ന ഒരു സാഹചര്യം നിലവിലുണ്ടെന്ന് ക്ലബ്ബ് അധികൃതർ വിശ്വസിക്കുന്നു.

വോൾവ്‌സിനെതിരായ മത്സരത്തിൽ പെനാൽറ്റി നിഷേധിച്ചതും ബേൺലിക്കെതിരായ ഗോൾ അനുവദിക്കാത്തതും ഇതിന് ഉദാഹരണങ്ങളായി അവർ ചൂണ്ടിക്കാട്ടുന്നു.
മത്സരത്തിൽ 2-0 എന്ന നിലയിൽ മുന്നിലെത്താനുള്ള അവസരം റഫറിയുടെ പിഴവ് മൂലം നഷ്ടമായെന്നും തൊട്ടുപിന്നാലെ റയാൻ ക്രിസ്റ്റിയിലൂടെ ബോൺമൗത്ത് സമനില പിടിച്ചെന്നുമാണ് യുണൈറ്റഡിന്റെ പരാതി.

കൂടാതെ ഒൻപത് മിനിറ്റ് അധികസമയം അനുവദിച്ചതിലും ബ്രെന്റ്‌ഫോർഡിനെതിരായ മത്സരത്തിൽ ചുവപ്പ് കാർഡ് നൽകാതിരുന്നതിലും ക്ലബ്ബിന് അതൃപ്തിയുണ്ട്. ഫുട്ബോൾ ഡയറക്ടർ ജേസൺ വിൽകോക്സ് പി.ജി.എം.ഒ.എൽ തലവൻ ഹോവാർഡ് വെബ്ബുമായി നേരിട്ട് സംസാരിക്കാൻ തീരുമാനിച്ചിട്ടുണ്ട്. ചാമ്പ്യൻസ് ലീഗ് യോഗ്യതയ്ക്കായുള്ള പോരാട്ടത്തിൽ ആസ്റ്റൺ വില്ലയേക്കാൾ നാല് പോയിന്റ് മുന്നിലുള്ള യുണൈറ്റഡിന് ഇത്തരം പിഴവുകൾ വലിയ തിരിച്ചടിയാണ് നൽകുന്നത്.