ലീഗ് 1ൽ കുതിപ്പിക്കുന്ന പി.എസ്.ജിയെ സമനിലയിൽ പിടിച്ച് കെട്ടി ലോറിയെന്റ്. 1-1നാണ് പി.എസ്.ജിയെ ലോറിയെന്റ് സമനിലയിൽ കുടുക്കിയത്. ഇഞ്ചുറി ടൈമിൽ ഐകാർഡിയുടെ ഗോളാണ് പി.എസ്.ജിയെ തോൽ‌വിയിൽ നിന്ന് രക്ഷിച്ചത്. സൂപ്പർ താരങ്ങളായ എമ്പപ്പെ, നെയ്മർ, വെറാറ്റി എന്നിവർ ഇല്ലാതെയാണ് പി.എസ്.ജി മത്സരത്തിന് ഇറങ്ങിയത്.
രണ്ടാം പകുതിയിൽ പകരക്കാരനായി ഇറങ്ങിയ സെർജിയോ റാമോസ് രണ്ട് മഞ്ഞ കാർഡ് കണ്ടു പുറത്തുപോയതോടെ 10 പേരുമായാണ് പി.എസ്.ജി മത്സരം അവസാനിപ്പിച്ചത്. ചുവപ്പ് കാർഡിന് പേരുകേട്ട സെർജിയോ റാമോസിന് പി.എസ്.ജി ജേഴ്സിയിൽ ഇത് മൂന്നാമത്തെ മത്സരം മാത്രമായിരുന്നു.
തുടർച്ചയായ 8 മത്സരങ്ങൾ പരാജയപെട്ടതിന് പിന്നാലെയാണ് ലോറിയെന്റ് പി.എസ്.ജിയെ നേരിടാൻ ഇറങ്ങിയത്. എന്നാൽ ആദ്യ പകുതിയിൽ പി.എസ്.ജിയെക്കാൾ മികച്ച നിന്ന ലോറിയെന്റ് മത്സരത്തിന്റെ 41ആം മിനുട്ടിൽ മോൺകോൺഡ്യൂയിറ്റിലൂടെ മത്സരത്തിൽ മുൻപിൽ എത്തുകയും ചെയ്തു. എന്നാൽ മത്സരം അവസാനിക്കാൻ മിനുട്ടുകൾ മാത്രം ബാക്കി നിൽക്കെ ഐകാർഡിയുടെ ഹെഡർ പി.എസ്.ജിയുടെ രക്ഷക്കെത്തുകയായിരുന്നു.
