ലീഗ് 1ൽ കുതിപ്പ് തുടരുന്ന പി.എസ്.ജിക്ക് ഉജ്ജ്വല ജയം. മോണ്ട്പെല്ലിയറിനെയാണ് പി.എസ്.ജി ഗോൾ മഴയിൽ മുക്കി തോൽപ്പിച്ചത്. ഒന്നിനെതിരെ അഞ്ചു ഗോളുകൾക്കായിരുന്നു പി.എസ്.ജിയുടെ ജയം. ജയത്തോടെ ലീഗ് 1ൽ ഒന്നാം സ്ഥാനത്ത് 15 പോയിന്റിന്റെ ലീഡ് നിലനിർത്താനും പി.എസ്.ജിക്കായി. മത്സരത്തിലുടനീളം സൂപ്പർ താരങ്ങളായ നെയ്മറുടെയും കവാനിയുടെയും അഭാവം പി.എസ്.ജി കാണിച്ചിരുന്നില്ല.
പി.എസ്.ജിക്ക് വേണ്ടി കുർസാവയാണ് ഗോളടി തുടങ്ങിയത്. പക്ഷെ അധികം വൈകാതെ മോണ്ട്പെല്ലിയർ മത്സരത്തിൽ ഫ്ലോറൻറ് മൊള്ളറ്റിലൂടെ സമനില പിടിച്ചു. എന്നാൽ ആദ്യ പകുതിയുടെ ഇഞ്ചുറി ടൈമിൽ ഡി മരിയയുടെ ലോകോത്തര ഫ്രീ കിക്ക്‌ ഗോളിൽ പി.എസ്.ജി വീണ്ടും മുൻപിലെത്തി.
രണ്ടാം പകുതിയിൽ പി.എസ്.ജി ഉഗ്രരൂപം പുറത്തെടുത്തപ്പോൾ മോണ്ട്പെല്ലിയറിന് മറുപടി ഉണ്ടായിരുന്നില്ല. ആദ്യം എൻകുൻങ്കുവും പിന്നെ മോണ്ട്പെല്ലിയർ ക്യാപ്റ്റൻ ഡാ സിൽവയുടെ സെൽഫ് ഗോളും എംബപ്പേയുടെ ഗോളും പി.എസ്.ജിയുടെ വിജയം രാജകീയമാക്കുകയായിരുന്നു.
