സ്പാനിഷ് ലാ ലീഗയിൽ വിനീഷ്യസ് ജൂനിയർ നേരിട്ട റേസിസ്റ്റു അധിക്ഷേപങ്ങളുടെ കാര്യത്തിൽ വിശദീകരണവും ആയി വലൻസിയ രംഗത്ത് എത്തി. ഒരിക്കൽ പോലും റേസിസം എന്ന പദം പോലും ഉപയോഗിക്കാതെ ആണ് വലൻസിയ വിശദീകരണ കുറിപ്പ് പുറത്ത് ഇറക്കിയത്. എല്ലാ തരത്തിലുള്ള അധിക്ഷേപങ്ങളും തങ്ങളെ വിഷമത്തിൽ ആക്കുന്നു എന്നു പറഞ്ഞ അവർ അതിനു എതിരെയാണ് തങ്ങൾ എന്നും പറഞ്ഞു. വലൻസിയയുടെ മൂല്യങ്ങൾക്ക് നിരക്കുന്നത് അല്ല സംഗതി എന്നു പറഞ്ഞ അവർ പക്ഷെ ഇത് ഒറ്റപ്പെട്ട സംഭവം ആണെന്ന് ആവർത്തിച്ചു.
സംഭവം ക്ലബ് അന്വേഷിക്കും എന്നും കുറ്റക്കാർക്ക് എതിരെ നടപടി ഉണ്ടാവും എന്നും കൂട്ടിച്ചേർത്തു. ഇത് പോലുള്ള ഒറ്റപ്പെട്ട സംഭവങ്ങളിൽ നിന്നു ക്ലബ് അകലം പാലിക്കുന്നത് ആയി പറഞ്ഞ വലൻസിയ ഇന്നലെ റയലിന് എതിരെ കളി കാണാൻ എത്തിയ 46,000 ആരാധകർക്ക് നന്ദിയും പറഞ്ഞു. അതേസമയം മുഴുവൻ സ്റ്റേഡിയവും വിനീഷ്യസിന് എതിരെ വംശീയ അധിക്ഷേപം ചൊരിഞ്ഞു എന്ന ആഞ്ചലോട്ടിയുടെ പരാമർശനത്തിന്‌ എതിരെയും വലൻസിയ പ്രതിനിധി രംഗത്ത് വന്നു. തങ്ങളുടെ എല്ലാ ആരാധകരും വംശീയവാദികൾ ആണെന്ന പരാമർശം അംഗീകരിക്കാൻ ആവില്ലെന്ന് അദ്ദേഹം പറഞ്ഞു.
