ഇന്ന് ഇന്ത്യൻ സൂപ്പർ ലീഗിൽ ഈസ്റ്റ് ബംഗാളിനെ നേരിട്ട കേരള ബ്ലാസ്റ്റേഴ്സ് ഒന്നിനെതിരെ രണ്ടു ഗോളിന് പരാജയപ്പെട്ടു. മലയാളി താരം വിഷ്ണുവും ഹിജാസിയും നേടിയ ഗോളിനായിരുന്നു ഈസ്റ്റ് ബംഗാളിന്റെ വിജയം. കേരള ബ്ലാസ്റ്റേഴ്സിനായി ഡാനിഷ് ആണ് ഗോൾ നേടിയത്.
ഈസ്റ്റ് ബംഗാൾ തന്നെ ആയിരുന്നു കൂടുതൽ അവസരങ്ങൾ സൃഷ്ടിച്ചത്. തുടക്കത്തിൽ ദിമിത്രിയോസിന്റെ ഒരു നല്ല ഷോട്ട് മനോഹരമായി സച്ചിൻ തടഞ്ഞു. പക്ഷെ അധിക സമയം ഈസ്റ്റ് ബംഗാളിനെ തടഞ്ഞു നിർത്താൻ ബ്ലാസ്റ്റേഴ്സിനായില്ല.
20ആം മിനുട്ടിൽ മലയാളി താരം വിഷ്ണുവിലൂടെ ഈസ്റ്റ് ബംഗാൾ ലീഡ് എടുത്ത. സച്ചിന് മുകളിലൂടെ പന്ത് വലയിലേക്ക് വിഷ്ണു തൊടുക്കുക ആയിരുന്നു. കോറോ ആ ഷോട്ട് ലൈനിൽ വെച്ച് സേവ് ചെയ്യാൻ ശ്രമിച്ചെങ്കിലും യുവതാരത്തിന് അതിനായില്ല.
ഇതിനു ശേഷം ക്ലൈറ്റൺ സിൽവക്ക് ഒരു നല്ല അവസരം ശ്രമിച്ചെങ്കിലും സച്ചിന്റെ സേവ് കേരള ബ്ലാസ്റ്റേഴ്സിനെ കാത്തു. 37ആം മിനുറ്റിൽ സെലിസിന്റെ ഒരു ലോംഗ് റേഞ്ചർ പോസ്റ്റിൽ തട്ടിയും മടങ്ങി.
രണ്ടാം പകുതിയിൽ കേരള ബ്ലാസ്റ്റേഴ്സ് പെപ്രയെ കളത്തിൽ ഇറക്കി കൂടുതൽ അറ്റാക്കിലേക്ക് മാറി. എന്നാൽ ഫൈനൽ തേഡിൽ നല്ല പാസുകൾ വരാത്തത് ബ്ലാസ്റ്റേഴ്സിനെ സമനില ഗോളിൽ നിന്ന് അകറ്റി. മത്സരത്തിന്റെ 72ആം മിനുറ്റിൽ ഹിജാസിയുടെ ഹെഡർ ഈസ്റ്റ് ബംഗാളിന്റെ ലീഡ് ഇരട്ടിയാക്കി.
84ആം മിനുറ്റിൽ ഡാനിഷ് ഫറൂഖിന്റെ മികച്ച ഫിനിഷ് കേരള ബ്ലാസ്റ്റേഴ്സിൽ പ്രതീക്ഷ നൽകി. പക്ഷെ സമനില ഗോൾ നേടാൻ സന്ദർശകർക്ക് ആയില്ല.
ഈ പരാജയത്തോടെ കേരള ബ്ലാസ്റ്റേഴ്സ് 21 പോയിന്റുമായി എട്ടാം സ്ഥാനത്ത് നിൽക്കുകയാണ്. ഈസ്റ്റ് ബംഗാൾ 17 പോയിന്റുമായി 11ആം സ്ഥാനത്തും നിൽക്കുന്നു.
