കേരള ബ്ലാസ്റ്റേഴ്സ് ഇന്നലെ നേടിയ വിജയം ടീമിന്റെ ഈ സീസണിലെ വഴിത്തിരിവായി മാറും എന്ന് കേരള ബ്ലാസ്റ്റേഴ്സ് പരിശീലകൻ കിബു വികൂന. ഇന്നലെ പത്തു പേരുമായി വെച്ച് പൊരുതി ജംഷദ്പൂരിനെ തോൽപ്പിക്കാൻ കേരള ബ്ലാസ്റ്റേഴ്സിനായിരുന്നു. 10 പേരുമായി പൊരുതിയത് ടീമിന്റെ കരുത്ത് തെളിയിക്കുന്നത് ആണ് എന്ന് കിബു വികൂന പറഞ്ഞു. പത്തു പേരുമായി കളിച്ച് വിജയിക്കുക എളുപ്പമല്ല. എന്നിട്ടും താരങ്ങൾ സധൈര്യം പോരാടി എന്ന് കിബു പറഞ്ഞു.
ജംഷദ്പൂർ വലിയ ടീമാണ്. ലീഗിലെ ഏറ്റവും മികച്ച സ്ട്രൈക്കർ അവർക്ക് വേണ്ടിയാണ് കളിക്കുന്നത്‌ ഒപ്പം അവർ ഈ സീസണിൽ വലിയ ടീമുകളെ ഒക്കെ തോൽപ്പിച്ചിട്ടുണ്ട്. ഈ വിജയം കേരള ബ്ലാസ്റ്റേഴ്സിന് നന്നായി കളിക്കാൻ ആകും എന്നും നന്നായി കളിച്ചു കൊണ്ട് തന്നെ വിജയിക്കാൻ ആകും എന്നും കേരള ബ്ലാസ്റ്റേഴ്സ് തെളിയിച്ചു എന്നും വികൂന പറഞ്ഞു. ഈ വിജയം ടീമിന് അത്യാവശ്യമായിരുന്നു. ഇത് ടീമിന്റെ ഈ സീസണിലെ വഴിത്തിരിവ് ആകും എന്നും കിബു പറഞ്ഞു.
