കേരള ബ്ലാസ്റ്റേഴ്സ് എഫ് സിയുടെ പ്രീസീസൺ ടൂർ സെപ്റ്റംബറിൽ നടക്കുമെന്ന് Halfway Football റിപ്പോർട്ട് ചെയ്യുന്നു. ഡൂറണ്ട് കപ്പ് കഴിഞ്ഞ ശേഷമാകും കേരള ബ്ലാസ്റ്റേഴ്സിന്റെ വിദേശ യാത്ര. പ്രീസീസൺ ടൂറിനായി ഇത്തവണയും യു എ ഇയിലേക്ക് ആണ് കേരള ബ്ലാസ്റ്റേഴ്സ് യാത്ര ചെയ്യുന്നത്. യു എ ഇയിലേക്കോ ഖത്തറിലേക്കോ പോകാൻ ആയിരുന്നു കേരള ബ്ലാസ്റ്റേഴ്സിന് ക്ഷണം ഉണ്ടായിരുന്നത്. കഴിഞ്ഞ പ്രീസീസൺ സാമ്പത്തികമായി വിജയമായിരുന്നത് കൊണ്ട് പരിശീലകൻ ഇവാൻ വുകമാനോവിച് ആ പ്രീസീസൺ യാത്രയിൽ സന്തുഷ്ടവനായതും കൊണ്ട്, കേരള ബ്ലാസ്റ്റേഴ്സ് വീണ്ടും യു എ ഇ തന്നെ തിരഞ്ഞെടുക്കുകയായിരുന്നു.
സെപ്റ്റംബർ 1നും 20നു ഇടയിൽ ആകും യു എ ഇ യാത്ര എന്നാണ് സൂചനകൾ. ബ്ലാസ്റ്റേഴ്സ് യു എ ഇയിലെ ചില വലിയ ടീമുകളുമായി സൗഹൃദ മത്സരങ്ങൾ കളിക്കും.യു എ ഇയിലെ ഒന്നാം ഡിവിഷനിലെ ടീമുകളുമായി തന്നെ ആകും സൗഹൃദ മത്സരങ്ങൾ.
കഴിഞ്ഞ പ്രീസീസൺ ടൂറിന് ഇടയിൽ ഇന്ത്യയെ ഫിഫ വിലക്കിയത് ബ്ലാസ്റ്റേഴ്സിന്റെ പ്രീസീസൺ ടൂറിനെ ബാധിച്ചിരുന്നു. മുൻകൂട്ടി നിശ്ചയിച്ചിരുന്ന പല സൗഹൃദ മത്സരങ്ങളും പദ്ധതി പ്രകാരം നടത്താൻ ബ്ലാസ്റ്റേഴ്സിനായിരുന്നില്ല. ഇത്തവണ അതിനൊക്കെ പരിഹാരം കണ്ടെത്താൻ ബ്ലാസ്റ്റേഴ്സിനാകും.
യു എ ഇയിൽ നടക്കുന്ന മത്സരങ്ങൾക്ക് ആരാധകർക്ക് പ്രവേശനം ഉണ്ടാകും. ഒപ്പം ബ്ലാസ്റ്റേഴ്സ് മത്സരം തത്സമയം ടെലികാസ്റ്റ് ചെയ്യുകയും ചെയ്യും. ജൂലൈയിൽ കൊച്ചിയിൽ വെച്ച് കേരള ബ്ലാസ്റ്റേഴ്സ് പ്രീസീസൺ ക്യാമ്പ് പുനരാരംഭിക്കുകയും ചെയ്യും.
