മുൻ റേഞ്ചേഴ്‌സ് ഫോർവേഡ് ജേസൺ കമ്മിംഗ്സ് ഇനി മോഹൻ ബഗാനിൽ. കമ്മിംഗ്സിന്റെ സൈനിംഗ് മോഹൻ ബഗാൻ ഇന്ന് ഔദ്യോഗികമായി പ്രഖ്യാപിച്ചു. ഇതോടെ മോഹൻ ബഗാന്റെ ഫോർവേഡ് ലൈൻ ഐ എസ് എല്ലിലെ തന്നെ ഏറ്റവും ശക്തമായ ലൈനപ്പ് ആയി മാറി എന്ന് പറയാം. മുംബൈ സിറ്റിയും താരത്തിനായി രംഗത്ത് ഉണ്ടായിരുന്നു എങ്കിലും ഇപ്പോൾ താരം മോഹൻ ബഗാൻ നൽകിയ ഓഫർ കമ്മിംഗ്സ് സ്വീകരിക്കുകയായിരുന്നു. ഇന്ത്യൻ സൂപ്പർ ലീഗിൽ ഏറ്റവും കൂടുതൽ പ്രതിഫലം വാങ്ങുന്ന കളിക്കാരനായി ഓസ്‌ട്രേലിയൻ ഇന്റർനാഷണൽ മാറും എന്നാണ് സൂചന.
എ ലീഗിൽ അവസാന രണ്ട് സീസണുകളിലായി സെൻട്രൽ കോസ്റ്റ് മറീനേഴ്‌സിനൊപ്പം ആയിരുന്നു കമ്മിംഗ്സ്. അവിടെ 49 മത്സരങ്ങളിൽ നിന്ന് 28 ഗോളുകൾ അദ്ദേഹം നേടി. മുമ്പ് ഹൈബർനിയനും ഡണ്ടിയും പോലുള്ള സ്കോട്ടിഷ് ക്ലബുകൾക്ക് ആയും ഇംഗ്ലീഷ് ക്ലബുകൾക്കായും താരം കളിച്ചിട്ടുണ്ട്. 27-കാരൻ മുമ്പ് സ്കോട്ട്‌ലൻഡ് ദേശീയ ടീമിനായി കളിച്ചിട്ടുണ്ട് എങ്കിലും ഇപ്പോൾ ഓസ്ട്രേലിയ ദേശീയ ടീമിന്റെ ഭാഗമാണ്. ലോകകപ്പിൽ ഓസ്ട്രേലിയക്ക് ആയി കമ്മിംഗ്സ് കളിച്ചിരുന്നു.
