ഫിഫ വനിതാ ലോകകപ്പിൽ ക്വാർട്ടർ ഫൈനൽ ഉറപ്പിച്ച് നെതർലന്റ്സ്. ഇന്ന് ദക്ഷിണാഫ്രിക്കക്ക് എതിരെ മറുപടിയില്ലാത്ത രണ്ടു ഗോളുകൾക്ക് ആണ് നെതർലൻഡ്സ് വിജയിച്ചത്. ദക്ഷിണാഫ്രിക്ക മികച്ച പ്രകടനം കാഴ്ചവെച്ചു എങ്കിലും ഡാഫ്നെ വാൻ ഡോംസെലാറിന്റെ മികച്ച ഗോൾ കീപ്പിംഗ് പ്രകടനം നെതർലന്റ്സിന്റെ വിജയം ഉറപ്പിച്ചു.
മാഞ്ചസ്റ്റർ സിറ്റിയുടെ പുതിയ സൈനിംഗായ ജിൽ റൂഡ് ആണ് ഒമ്പതാം മിനിറ്റിൽ ഡച്ചുകാരെ മുന്നിൽ എത്തിച്ചത്. രണ്ടാം പകുതിയിൽ ദക്ഷിണാഫ്രിക്കൻ കീപ്പർ കെയ്ലിൻ സ്വാർട്ടിന്റെ പിഴവിൽ നിന്ന് ലിനെത്ത് ബീറൻസ്റ്റൈൻ നെതർലന്റ്സിന്റെ ലീഡ് ഇരട്ടിയാക്കി. ഈ ഗോൾ അവരുടെ വിജയവും ഉറപ്പിച്ചു.
ഇന്ന് മഞ്ഞക്കാർഡ് വാങ്ങിയ മധ്യനിര താരം ഡാനിയേൽ വാൻ ഡി ഡോങ്കിന് ക്വാർട്ടർ ഫൈനൽ നഷ്ടമാകും. ഇനി ക്വാർട്ടർ ഫൈനലിൽ അടുത്ത വെള്ളിയാഴ്ച സ്പെയിനിനെ ആകും നെതർലന്റ്സ് നേരിടുക.
