യൂറോപ്പ വഴി ചാമ്പ്യൻസ് ലീഗിലെത്താൻ ആഴ്‌സണൽ ഇറങ്ങുന്നു

Arsenal Lacasatte
- Advertisement -

പ്രീമിയർ ലീഗിൽ ടോപ് ഫോറിലെത്താൻ അത്ഭുതങ്ങൾ വേണമെന്നിരിക്കെ ചാമ്പ്യൻസ് ലീഗ് യോഗ്യത ഉറപ്പിക്കാൻ യൂറോപ്പ ലീഗ് കിരീടം സ്വപ്നം കണ്ട് ആഴ്‌സണൽ ഇന്ന് വലൻസിയയെ നേരിടും. വലൻസിയയുടെ ഗ്രൗണ്ടിൽ നടക്കുന്ന മത്സരത്തിൽ ആദ്യ പാദത്തിൽ 3-1ന്റെ ലീഡുമായാണ് ആഴ്‌സണൽ ഇറങ്ങുന്നത്. ഇഞ്ചുറി ടൈമിൽ ഒബാമയാങ് നേടിയ ഗോളാണ് രണ്ടു ഗോളിന്റെ ലീഡ് ആദ്യ പാദത്തിൽ നേടാൻ ആഴ്‌സണലിനെ സഹായിച്ചത്. മത്സരത്തിൽ മറ്റു രണ്ടു ഗോളുകൾ നേടിയത് ലാകസറ്റേയായിരുന്നു.

2006ന് ശേഷം തങ്ങളുടെ ആദ്യ യൂറോപ്യൻ ഫൈനൽ ലക്‌ഷ്യം വെച്ചാണ് ആഴ്‌സണൽ ഇന്ന് ഇറങ്ങുന്നത്. അന്ന് ഫൈനലിൽ ബാഴ്‌സലോണയോട് ആഴ്‌സണൽ തോറ്റ് പുറത്തായിരുന്നു. സെവിയ്യയുടെ കൂടെ തുടർച്ചയായി മൂന്ന് കിരീടങ്ങൾ നേടിയ പരിശീലകൻ ഉനൈ എമേറി കൂടെയുള്ളപ്പോൾ മറ്റൊരു യൂറോപ്യൻ ഫൈനൽ ആഴ്‌സണൽ ആരാധകർ സ്വപ്നം കാണുന്നുണ്ട്. കഴിഞ്ഞ ദിവസം പ്രീമിയർ ലീഗിൽ ബ്രൈട്ടനെതിരെ സമനില വഴങ്ങിയതോടെ യൂറോപ്പ ലീഗ് കിരീടം മാത്രമാണ് ആഴ്‌സണലിന് അടുത്ത വർഷത്തെ ചാമ്പ്യൻസ് ലീഗിലേക്കുള്ള ഏക വഴി. പ്രീമിയർ ലീഗിൽ ടോപ് ഫോറിലെത്താൻ വിദൂര സാധ്യത ആഴ്‌സണലിന് ഉണ്ടെങ്കിലും അത് സംഭവിക്കാനുള്ള സാധ്യത കുറവാണ്. അവസാന മത്സരത്തിൽ ആഴ്‌സണൽ ജയിക്കുകയും ടോട്ടൻഹാം തോൽക്കുകയും 8 ഗോളിന്റെ വ്യതാസം ഇരു ടീമുകളും തമ്മിൽ വന്നാൽ മാത്രമേ ആഴ്‌സണൽ ടോപ് ഫോറിൽ എത്തു.

അതെ സമയം ലാ ലീഗയിൽ കഴിഞ്ഞ ദിവസം ഹുസ്‌കയെ 6 -2ന് തൊപ്പിച്ച് കൊണ്ടാണ് വലൻസിയ സ്വന്തം ഗ്രൗണ്ടിൽ രണ്ടാം പാദ മത്സരത്തിന് ഇറങ്ങുന്നത്. ആഴ്‌സണൽ നിരയിൽ പരിക്കേറ്റ ആരോൺ റാംസി, ഡെന്നിസ് സുവാരസ്, ഹെക്ടർ ബെല്ലറിൻ, ഡാനി വെൽബെക്, റോബ് ഹോൾഡിങ് എന്നിവർ എല്ലാം പരിക്ക് മൂലം ഇന്നത്തെ മത്സരത്തിന് ഇറങ്ങില്ല.

Advertisement