മാഞ്ചസ്റ്റർ സിറ്റിയും റയൽ മാഡ്രിഡും വീണ്ടും ചാമ്പ്യൻസ് ലീഗിൽഏറ്റുമുട്ടും. പ്ലേ -ഓഫ് റൗണ്ടിൽ ഇന്ന് നടന്ന നറുക്കിൽ ഇരുവരും നേർക്കുനേർ വരുമെന്ന് ഉറപ്പായി. ഇത് തുടർച്ചയായ നാലാം സീസണിലാണ് നോക്കൗട്ട് ഘട്ടത്തിൽ ഇരു ടീമുകളും നേർക്കുനേർ വരുന്നത്. കഴിഞ്ഞ വർഷത്തെ ക്വാർട്ടർ ഫൈനൽ പെനാൽറ്റിയിൽ റയൽ മാഡ്രിഡ് സിറ്റിക്ക് എതിരെ വിജയിച്ചിരുന്നു.
ലീഗ് ഘട്ടത്തിൽ 22-ാം സ്ഥാനത്ത് ഫിനിഷ് ചെയ്ത സിറ്റി, ആദ്യ പാദത്തിന് ആതിഥേയത്വം വഹിക്കും, രണ്ടാം പാദമാകും സ്പെയിനിൽ നടക്കുക.
മറ്റ് ശ്രദ്ധേയമായ മത്സരങ്ങളിൽ ബയേൺ മ്യൂണിക്ക് സെൽറ്റിക്കിനെയും പാരീസ് സെന്റ് ജെർമെയ്ൻ ബ്രെസ്റ്റിനെയും നേരിടും. യുവന്റസ് പി‌എസ്‌വി ഐന്തോവൻ, ഫെയെനൂർഡ് എസി മിലാൻ, അറ്റലാന്റ ക്ലബ് ബ്രൂജെ, സ്‌പോർട്ടിംഗ് ലിസ്ബൺ ബൊറൂസിയ ഡോർട്ട്മുണ്ട്, മൊണാക്കോ ബെൻഫിക്ക എന്നിങ്ങനെയാണ് മറ്റ് പോരാട്ടങ്ങൾ.
ഈ മത്സരങ്ങളിലെ വിജയികൾ അവസാന 16-ലേക്ക് മുന്നേറും, ലിവർപൂൾ, ബാഴ്‌സലോണ, ആഴ്‌സണൽ, ഇന്റർ മിലാൻ, അത്‌ലറ്റിക്കോ മാഡ്രിഡ്, ബയേർ ലെവർകുസെൻ, ലില്ലെ, ആസ്റ്റൺ വില്ല എന്നിവർ അവിടെ ഇതിനകം തന്നെ എത്തിയിട്ടുണ്ട്.
