ജർമ്മൻ ബുണ്ടസ് ലീഗയിൽ സ്റ്റുഗാർട്ടിനോട് ഒന്നിനെതിരെ 5 ഗോളുകൾക്ക് വലിയ പരാജയം ഏറ്റു വാങ്ങി ബൊറൂസിയ ഡോർട്ട്മുണ്ട്. ഡോർട്ട്മുണ്ടിനു മേൽ സ്വന്തം മൈതാനത്ത് വലിയ ആധിപത്യം പുലർത്തിയ സ്റ്റുഗാർട്ട് ആദ്യ പകുതിയിൽ ഡെന്നിസ് ഉണ്ടാവ്, എർമെദിൻ ഡെമിറോവിച് എന്നിവരുടെ ഗോളിന് മുന്നിൽ എത്തി. ഇരു ഗോളിനും മാക്‌സ്മില്യൻ ആണ് വഴി ഒരുക്കിയത്. രണ്ടാം പകുതിയിൽ കറസോറിന്റെ പാസിൽ നിന്നു എൻസോ മിലറ്റ് അവരുടെ മൂന്നാം ഗോളും നേടി.
തുടർന്ന് മുൻ സ്റ്റുഗാർട്ട് താരം ഗുയിരാസി ഒരു ഗോൾ മടക്കിയെങ്കിലും അത് ഒന്നും ഡോർട്ട്മുണ്ടിനു തിരിച്ചു വരാൻ ഉപകരിച്ചില്ല. എൻസോ മിലറ്റിന്റെ പാസിൽ നിന്നു ഗോൾ നേടിയ പകരക്കാരനായ എൽ ടോറെ സ്റ്റുഗാർട്ടിന് നാലാം ഗോളും സമ്മാനിച്ചു. തുടർന്ന് എൻസോ മിലറ്റിന്റെ പാസിൽ നിന്നു തന്റെ രണ്ടാം ഗോൾ 90 മത്തെ മിനിറ്റിൽ നേടിയ ഡെന്നിസ് ഉണ്ടാവ് സ്റ്റുഗാർട്ട് ജയം പൂർത്തിയാക്കുക ആയിരുന്നു. നിലവിൽ ലീഗിൽ സ്റ്റുഗാർട്ട് ഏഴാമതും ഡോർട്ട്മുണ്ട് എട്ടാമതും ആണ്.
