ജർമ്മൻ ബുണ്ടസ് ലീഗയിൽ തന്റെ മികവ് തുടർന്ന് ഹാരി കെയിൻ. ഹാട്രിക് ഗോളുകളും 2 അസിസ്റ്റുകളും ആയി തിളങ്ങിയ കെയിനിന്റെ മികവിൽ ബോകമിനെ എതിരില്ലാത്ത 7 ഗോളുകൾക്ക് ആണ് ബയേൺ മ്യൂണിക് ഇന്ന് തകർത്തത്. ബയേണിന്റെ വലിയ ആധിപത്യം കണ്ട മത്സരത്തിൽ നാലാം മിനിറ്റിൽ സാനെയുടെ പാസിൽ നിന്നു ചുപോ മോട്ടിങ് ആണ് അവരുടെ ഗോൾ വേട്ട തുടങ്ങിയത്. 12 മത്തെ മിനിറ്റിൽ കെയിൻ തന്റെ ഗോൾ വേട്ടക്ക് തുടക്കമിട്ടു. 29 മത്തെ മിനിറ്റിൽ ജോഷുവ കിമ്മിഷിന്റെ പാസിൽ നിന്നു ഡി ലിറ്റ് മൂന്നാം ഗോൾ നേടി. 9 മിനിറ്റിനുള്ളിൽ സാനെയുടെ ഗോളിന് അവസരം ഒരുക്കിയത് കെയിൻ ആയിരുന്നു.
രണ്ടാം പകുതിയിൽ 54 മത്തെ മിനിറ്റിൽ ഹാന്റ് ബോളിന് ലഭിച്ച പെനാൽട്ടി ലക്ഷ്യം കണ്ട കെയിൻ ബയേണിന്റെ അഞ്ചാം ഗോളും നേടി. 81 മത്തെ മിനിറ്റിൽ മത്തിയാസ് ടെലിന്റെ ഗോളിന് അവസരം ഉണ്ടാക്കിയ കെയിൻ 88 മത്തെ മിനിറ്റിൽ തന്റെ ഹാട്രിക്കും ബയേണിന്റെ വമ്പൻ ജയവും പൂർത്തിയാക്കുക ആയിരുന്നു. ഇത് വരെ കളിച്ച 5 ബുണ്ടസ് ലീഗ മത്സരങ്ങളിൽ നിന്നു 7 ഗോളുകൾ നേടിയ കെയിൻ ബയേണിന് ആയി ആദ്യ 5 കളികളിൽ നിന്നു ഏറ്റവും കൂടുതൽ ഗോൾ നേടുന്ന താരവും ആയി. ജയത്തോടെ ബയേൺ ഒന്നാം സ്ഥാനത്ത് തിരികെയെത്തി. അതേസമയം 14 മത് ആണ് ബോകം.
