ഐപിഎലില്‍ ഫോമിലേക്ക് മടങ്ങിയെത്തി രോഹിത്ത് ശര്‍മ്മയും ഇഷാന്‍ കിഷനും. ഗുജറാത്തിനെതിരെ ടോസ് നഷ്ടമായി ബാറ്റിംഗിനിറങ്ങിയ മുംബൈ ഇന്ത്യന്‍സ് 177 റൺസാണ് നേടിയത്. ഓപ്പണര്‍മാരുടെ മിന്നും തുടക്കത്തിൽ ഒരു ഘട്ടത്തിൽ 200ന് മേലെ റൺസ് മുംബൈ നേടുമെന്നാണ് ഏവരും പ്രതീക്ഷിച്ചതെങ്കിലും ഗുജറാത്ത് ബൗളര്‍മാര്‍ മത്സരത്തിൽ ശക്തമായ തിരിച്ചുവരവ് നടത്തുകയായിരുന്നു. അവസാന ഓവറുകളിൽ തകര്‍ത്തടിച്ച ടിം ഡേവിഡിന്റെ പ്രകടനം ആണ് മുംബൈയ്ക്ക് തുണയായത്.
ഒന്നാം വിക്കറ്റിൽ 74 റൺസാണ് രോഹിത് – ഇഷാന്‍ കൂട്ടുകെട്ട് നേടിയത്. 28 പന്തിൽ 43 റൺസ് നേടിയ രോഹിത്തിനെ റഷീദ് ഖാന്‍ വിക്കറ്റിന് മുന്നിൽ കുടുക്കിയാണ് ഈ കൂട്ടുകെട്ട് തകര്‍ത്തത്.
എന്നാൽ ഈ മികച്ച തുടക്കം മുംബൈ കൈവിടുന്ന കാഴ്ചയാണ് കണ്ടത്. വിക്കറ്റുകളുമായി ഗുജറാത്ത് ബൗളര്‍മാര്‍ തിരിച്ചടിച്ചപ്പോള്‍ 74/0 എന്ന നിലയിൽ നിന്ന് മുംബൈ 119/4 എന്ന നിലയിലേക്ക് വീണു. പിന്നീട് ടിം ഡേവിഡ് – തിലക് വര്‍മ്മ കൂട്ടുകെട്ട് 38 റൺസ് നേടിയാണ് മുംബൈയെ 150 കടത്തിയത്.
21 പന്തിൽ 44 റൺസുമായി ടിം ഡേവിഡ് പുറത്താകാതെ നിന്നപ്പോള്‍ താരം 4 സിക്സും രണ്ട് ഫോറും നേടി. 6 വിക്കറ്റ് നഷ്ടത്തിൽ 177 റൺസാണ് മുംബൈ നേടിയത്. തന്റെ നാലോവറിൽ 24 റൺസ് വിട്ട് നൽകി രോഹിത് ശര്‍മ്മയെയും ടിം ഡേവിഡിനെയും പുറത്താക്കിയ റഷീദ് ഖാന്റെ സ്പെല്ലാണ് ഗുജറാത്ത് ബൗളര്‍മാരിൽ എടുത്ത് പറയേണ്ടത്.
