നേഷൻസ് ലീഗ് – സ്പെയിനിനെ വീഴ്ത്തി സ്വിസ് പട

യുഫേഫ നേഷൻസ് ലീഗ് ഗ്രൂപ്പ് എ 2 വിൽ സ്പെയിനിനെ ഒന്നിനെതിരെ രണ്ടു ഗോളുകൾക്ക് വീഴ്ത്തി സ്വിസർലന്റ്. സ്വന്തം മൈതാനത്ത് നടന്ന മത്സരത്തിൽ പന്ത് കൂടുതൽ നേരം കൈവശം വച്ചത് സ്‌പെയിൻ ആയിരുന്നു എങ്കിലും അവർക്ക് അത് ജയം ആയി മാറ്റാൻ സാധിച്ചില്ല. മത്സരത്തിൽ 21 മത്തെ മിനിറ്റിൽ റൂബൻ വർഗാസിന്റെ കോർണറിൽ നിന്നു ഹെഡറിലൂടെ പ്രതിരോധതാരം മാനുവൽ അക്കാഞ്ചി സ്വിസ് ടീമിന് മുൻതൂക്കം സമ്മാനിക്കുക ആയിരുന്നു.

രണ്ടാം പകുതി തുടങ്ങി 10 മിനിറ്റിനുള്ളിൽ സ്പെയിൻ മത്സരത്തിൽ ഒപ്പമെത്തി. മാർകോ അസൻസിയോയുടെ പാസിൽ നിന്നു ജോർദി ആൽബയാണ് സമനില ഗോൾ കണ്ടത്തിയത്. 3 മിനിറ്റിനുള്ളിൽ സ്വിസ് ടീം തങ്ങളുടെ മുൻതൂക്കം തിരിച്ചു പിടിച്ചു. വർഗാസിന്റെ ഫ്രീകിക്കിൽ നിന്നു അക്കാഞ്ചിയുടെ ഗോൾ നേടാനുള്ള ശ്രമം എറിക് ഗാർസിയയുടെ ദേഹത്ത് തട്ടി സെൽഫ് ഗോൾ ആവുക ആയിരുന്നു. ജയത്തോടെ ഗ്രൂപ്പിൽ നിലവിൽ മൂന്നാമത് ആവാൻ സ്വിസ് ടീമിന് ആയി എന്നാൽ സ്‌പെയിൻ ഗ്രൂപ്പിൽ രണ്ടാമത് തുടരുകയാണ്.