കേരളത്തിനെതിരെ പത്ത് വിക്കറ്റ് ജയം സ്വന്തമാക്കി പഞ്ചാബ്. 128 റണ്‍സ് വിജയലക്ഷ്യം തേടിയിറങ്ങിയ പഞ്ചാബ് 27.4 ഓവറില്‍ നിന്ന് വിക്കറ്റ് നഷ്ടമില്ലാതെ 131 റണ്‍സ് നേടിയാണ് വിജയം ഉറപ്പാക്കിയത്. ശുഭ്മന്‍ ഗില്‍ 69 റണ്‍സും ജീവന്‍ജോത് സിംഗ് 48 റണ്‍സും നേടിയാണ് കേരള ബൗളര്‍മാര്‍ക്ക് ഒരവസരം പോലും നല്‍കാതെ വിജയം സ്വന്തമാക്കിയത്.
മത്സരത്തില്‍ നിന്ന് പഞ്ചാബ് ഏഴ് പോയിന്റ് നേടി. ഇതോടെ ക്വാര്‍ട്ടര്‍ ഉറപ്പാക്കുവാനുളള കേരളത്തിന്റെ പ്രതീക്ഷകള്‍ക്ക് ഈ മത്സരഫലം തിരിച്ചടിയാവും. നേരത്തെ 190/4 എന്ന ശക്തമായ നിലയില്‍ നിന്ന് കേരളം രണ്ടാം ഇന്നിംഗ്സില്‍ 223 റണ്‍സിനു ഓള്‍ഔട്ട് ആവുകയായിരുന്നു. മയാംഗ് മാര്‍ക്കണ്ടേയുടെ പന്തുകള്‍ക്ക് മുന്നില്‍ കേരളം പതറുകയായിരുന്നു. മുഹമ്മദ് അസ്ഹറുദ്ദീന്‍ 112 റണ്‍സുമായി കേരളത്തിന്റെ ടോപ് സ്കോറര്‍ ആയി.
