വേൾഡ് കപ്പിലെ ഇന്ത്യയുടെ ആദ്യ മാച്ചിൽ വിരാട് പാകിസ്ഥാനെ തോൽപ്പിച്ചു. എംസിജിയിലെ ഒരു ലക്ഷം കാണികൾക്കിടയിൽ, രണ്ടാമത്തെ ഡെക്കിൽ ഇരുന്നു കളി കണ്ട സുഹൃത്ത് മെസ്സേജ് അയച്ചു. അടുത്ത മെസ്സേജ് എനിക്ക് വായിക്കാൻ പറ്റുന്നുണ്ടായിരുന്നില്ല, ടിവിയിൽ കളി കണ്ടു കൊണ്ടിരുന്ന എന്റെ കണ്ണുകൾ നിറഞ്ഞിരുന്നു. കണ്ണ് തുടച്ചു ഞാൻ സുഹൃത്തിന്റെ മെസ്സേജ് വായിച്ചു, ഞാൻ കരയുകയാണ്, പിന്നീട് വിളിക്കാം.
ഇന്ന് പാകിസ്താനെതിരെ ഇന്ത്യ ജയിച്ച കളി കണ്ട എല്ലാ ഇന്ത്യക്കാരുടെ കണ്ണുകളും നിറഞ്ഞിട്ടുണ്ടാകും. കളി ജയിച്ചത് കൊണ്ടല്ല, എങ്ങനെ ആ കളി കോഹ്ലി ജയിപ്പിച്ചു എന്നത് കൊണ്ട്. കോഹ്ലിയുടെ കണ്ണുകളും നിറഞ്ഞിരുന്നു എന്ന് നമ്മൾ കണ്ടു.
നാളത്തെ പത്രങ്ങളിലെ തലക്കെട്ടുകൾ അതിശയോക്തി നിറഞ്ഞതാകും എന്ന് കരുതുന്നില്ല. വീരൻ വിരാട്, വീരാടി വിരാട്, വില്ലാളി വീരൻ വിരാട് എന്നിങ്ങനെയുള്ള തലക്കെട്ടുകൾ കണ്ടാൽ അത്ഭുതം തോന്നാൻ വഴിയില്ല. വിരാട് കോഹ്ലി അതെല്ലാം അർഹിക്കുന്നത് തന്നെയാണ്. ആദ്യ 10 ഓവറിൽ 50ൽ താഴെ മാത്രം റണ് എടുത്തു 4 വിക്കറ്റും കളഞ്ഞു നിൽക്കുന്നിടത്തു നിന്നാണ് അടുത്ത പത്തോവറിൽ 110 റണ്സ് എടുത്തു ഹാർദിക്കിനോടൊപ്പം ഇന്ത്യയുടെ ഒരേയൊരു കൂട്ടുകെട്ട് പടുത്തുയർത്തി വിരാട് ഇന്ത്യയെ വിജയിപ്പിച്ചത്. ഓരോ ഘട്ടത്തിലും ഇന്ത്യക്ക് ജയിക്കാൻ വേണ്ടിയിരുന്നു റണ്ണുകളുടെ എണ്ണം കണ്ട് എല്ലാവരും തോൽവി പ്രതിക്ഷിച്ചിരുന്നപ്പോൾ, വിരാട് മാത്രമാണ് വിജയത്തിനായി അവസാനം വരെ പോരാടിയത്.
കഴിഞ്ഞ രണ്ട് മൂന്ന് കൊല്ലമായി ഈ മുൻ ക്യാപ്റ്റനെ എഴുതി തള്ളിയിരുന്ന എല്ലാവരും ഇന്ന് ആ മനുഷ്യനെ വാഴ്ത്തുന്ന തിരക്കിലാകും. ഒരവസരത്തിൽ ഈ കളിക്കാരനെ അപമാനിക്കാൻ ശ്രമിച്ച ബിസിസിഐ അംഗങ്ങൾ അഭിനന്ദനങ്ങൾ ട്വീറ്റ് ചെയ്യുന്നുണ്ടാകും.
ഇന്ത്യയുടെ എക്കാലത്തെയും ക്രിക്കറ്റ് കളിക്കാരിൽ മുൻപന്തിയിൽ വിരാട് കോഹ്ലിയുടെ പേര് എന്നുമുണ്ടാകും. ഈ ഒരു കളി കാരണം മാത്രമല്ല അതു, പക്ഷെ ഇന്നത്തെ കളി ആ സ്ഥാനം ഒന്നുകൂടി ഉറപ്പിച്ചു. ഷൈജു ദാമോദരന്റെ പഴയ കമന്ററി കടമെടുത്ത് നമുക്ക് പറയാം, ദിസ് ഇസ് വൈ ദിസ് മാൻ ഈസ് കോൾഡ് കിംഗ്‌!
