ഓസ്ട്രേലിയയ്ക്കെതിരെ ഇന്ത്യയുടെ അവസാന രണ്ട് ഏകദിനങ്ങളില്‍ ഇന്ത്യ എംഎസ് ധോണിയ്ക്ക് വിശ്രമം നല്‍കും. ഇന്ത്യയുടെ ബാറ്റിംഗ് കോച്ച് സഞ്ജയ് ബംഗാര്‍ ആണ് ഇക്കാര്യം വെളിപ്പെടുത്തിയത്. ധോണിയ്ക്ക് പകരം ഋഷഭ് പന്താണ് വിക്കറ്റ് കീപ്പറുടെ റോള്‍ കൈയ്യാളുക. മുഹമ്മദ് ഷമിയ്ക്കും അടുത്ത മത്സരം നഷ്ടമായേക്കുമെന്നാണ് ലഭിയ്ക്കുന്ന സൂചന. മൂന്നാം ഏകദിനത്തിനിടെ ബൗളിംഗിനിടെ താരത്തിനു പരിക്കേറ്റിരുന്നു.
തന്റെ ബൗളിംഗില്‍ സ്ട്രെയിറ്റ് ഡ്രൈവ് കാലില്‍ വന്ന് തട്ടി ഷമി കളം വിട്ടുവെങ്കിലും പിന്നീട് തന്റെ ഓവറുകളുടെ ക്വോട്ട തികയ്ക്കുവാന്‍ താരം തിരികെ എത്തിയിരുന്നു. ഷമിയുടെ ഫിറ്റ്നെസ്സ് അവലോകവനം ചെയ്ത ശേഷം അന്തിമ തീരുമാനം എടുക്കുമെന്നും ബംഗാര്‍ പറഞ്ഞു. ഷമി കളിയ്ക്കുന്നില്ലെങ്കില്‍ പകരക്കാരനായി ഭുവനേശ്വര്‍ കുമാര്‍ എത്തും. ഇക്കാര്യത്തില്‍ അന്തിമ തീരുമാനം ക്യാപ്റ്റനും കോച്ചുമാവും കൈക്കൊള്ളുക എന്നും ബംഗാര്‍ വ്യക്തമാക്കി.
