ഇന്ത്യന്‍ ടോപ് ഓര്‍ഡറിനെ തകര്‍ത്തെറിഞ്ഞ് മാറ്റ് ഹെന്‍റി

- Advertisement -

ഇന്ത്യയുടെ ലോകകപ്പ് ഫൈനല്‍ മോഹങ്ങള്‍ക്ക് മാറ്റ് ഹെന്‍റിയിലൂടെ കനത്ത വെല്ലുവിളിയുയര്‍ത്തി ന്യൂസിലാണ്ട്. ഇന്ന് 240 റണ്‍സ് ലക്ഷ്യം പിന്തുടര്‍ന്നിറങ്ങിയ ഇന്ത്യയ്ക്ക് ആദ്യ പത്തോവറില്‍ 24 റണ്‍സിന് നാല് വിക്കറ്റാണ് നഷ്ടമായത്. മാറ്റ് ഹെന്‍റിയുടെയും ട്രെന്റ് ബോള്‍ട്ടിന്റെയും തീപാറുന്ന പന്തുകള്‍ അതിജീവിക്കാനാകാതെ ഇന്ത്യന്‍ ടോപ് ഓര്‍ഡര്‍ തകര്‍ന്നടിയുകയായിരുന്നു. 5/3 എന്ന നിലയിലേക്ക് വീണ ഇന്ത്യയുടെ ടോപ് ഓര്‍ഡര്‍ ബാറ്റ്സ്മാന്മാരായ രോഹിത്, രാഹുല്‍, കോഹ്‍ലി എന്നിവര്‍ വെറും ഒരു റണ്‍സ് മാത്രമാണ് നേടിയത്.

രോഹിത്തിനെയും ലോകേഷ് രാഹുലിനെയും മാറ്റ് ഹെന്‍റി പുറത്താക്കിയപ്പോള്‍ വിരാട് കോഹ്‍ലിയെ ട്രെന്റ് ബോള്‍ട്ട് വിക്കറ്റിന് മുന്നില്‍ കുടുക്കി. പത്താം ഓവറിന്റെ അവസാന പന്തില്‍ ദിനേശ് കാര്‍ത്തിക്കിനെ തകര്‍പ്പനൊരു ക്യാച്ചിലൂടെ ജെയിംസ് നീഷം പിടിച്ച് പുറത്താക്കിയപ്പോള്‍ മാറ്റ് ഹെന്‍റി തന്റെ നാലാം വിക്കറ്റ് നേടി. ഒടുവില്‍ റിപ്പോര്‍ട്ട് കിട്ടുമ്പോള്‍ ഇന്ത്യ 12 ഓവറില്‍ 35/4 എന്ന നിലയിലാണ്.

Advertisement