ശ്രീലങ്കന്‍ ഓപ്പണിംഗ് താരം ധനുഷ്ക ഗുണതിലകയ്ക്കെതിരെയുള്ള ആരോപണങ്ങളില്‍ അസത്യങ്ങള്‍ പ്രചരിപ്പിച്ചതിനു നടപടി വേണമെന്ന് പരക്കെ ആവശ്യം. ശ്രീലങ്കയില്‍ നിന്ന് യുഎഇയിലേക്ക് താരം ബാറ്റിംഗ് കിറ്റ് ഇല്ലാതെയാണ് യാത്രയായതെന്നും പരിക്ക് മറച്ച് വെച്ചാണ് താരം ഏഷ്യ കപ്പ് ടീമില്‍ എത്തിയതെന്നുമാണ് ഒരു ശ്രീലങ്കന്‍ പത്രം പുറത്ത് വിട്ടത്.
അതിനെ ആസ്പദമാക്കി ഇന്ത്യന്‍ മാധ്യമങ്ങളും ഈ വാര്‍ത്ത് ഏറ്റു പിടിച്ചു. അതേ സമയം ശ്രീലങ്കയിലെത്തിയ താരം പരിക്ക് കലശലായതിനെത്തുടര്‍ന്ന് താരം പിന്മാറുകയായിരുന്നു. എന്നാല്‍ ഇത് സത്യമല്ലെന്നാണ് പത്രത്തിന്റെ ഭാഷ്യം. തനിക്ക് നേരത്തെ തന്നെയുള്ള പരിക്ക് മാനേജ്മെന്റിനെ അറിയിക്കാതെ കിറ്റ് പോലുമില്ലാതെയാണ് ധനുഷ്ക യുഎഇയില്‍ എത്തിയതെന്ന രീതിയിലുള്ള വാര്‍ത്തയാണ് ശ്രീലങ്കയിലെ ദി ഐലന്‍ഡ് പത്രം നല്‍കിയത്.
ഇതിനെതിരെ ശ്രീലങ്കയിലെ തന്നെ മാധ്യമ പ്രവര്‍ത്തകരും ക്രിക്കറ്റ് രംഗത്ത് സജീവമായ വ്യക്തികളും രംഗത്തെത്തിയിട്ടുണ്ട്. ഒരു കളിക്കാരനെ ഇല്ലാത്താക്കുവാനുള്ള ഗൂഢ ശ്രമമാണ് നടക്കുന്നതെന്നും ഇത്തരത്തില്‍ കപട വാര്‍ത്തകള്‍ പടച്ച് വിട്ട് താരത്തിനെ ഇകഴ്ത്തിക്കാണിക്കുവാന്‍ ശ്രമിച്ച പത്രത്തിനെതിരെ നടപടിയെടുക്കണമെന്ന് ഇവര്‍ ശ്രീലങ്കന്‍ ബോര്‍ഡിനോടും കായിക മന്ത്രിയോടും ഇവര്‍ ആവശ്യപ്പെട്ടിട്ടുണ്ട്.
ഇപ്പോള്‍ താരം സ്വയം പത്രത്തിനെതിരെ നിയമ നടപടിയ്ക്ക് മുതിരുന്നു എന്നാണ് ലഭിയ്ക്കുന്ന വിവരം.
