പ്രീമിയർ ലീഗിൽ ലെസ്റ്റർ സിറ്റിക്കെതിരെ മികച്ച ജയവുമായി ചെൽസി. ഇന്ന് ലെസ്റ്റർ സിറ്റിയുടെ ഗ്രൗണ്ടിൽ നടന്ന മത്സരത്തിൽ ഏകപക്ഷീയമായ മൂന്ന് ഗോളുകൾക്കാണ് ചെൽസി ലെസ്റ്റർ സിറ്റിയെ പരാജയപ്പെടുത്തിയത്. ചെൽസിയുടെ സമ്പൂർണ ആധിപത്യം കണ്ട മത്സരത്തിൽ ഒരു ഘട്ടത്തിൽ പോലും ചെൽസിക്ക് കാര്യമായ വെല്ലുവിളി സൃഷ്ട്ടിക്കാൻ ലെസ്റ്റർ സിറ്റിക്കായില്ല. ജയത്തോടെ പ്രീമിയർ ലീഗിന്റെ തലപ്പത്ത് 6 പോയിന്റിന്റെ ലീഡ് നേടാനും ചെൽസിക്കായി.
തുടക്കം മുതൽ ചെൽസി ആധിപത്യം ഉറപ്പിക്കുന്ന പ്രകടനമാണ് മത്സരത്തിൽ പുറത്തെടുത്തത്. തുടർന്ന് ചിൽവെല്ലിന്റെ കോർണറിൽ നിന്ന് ഗോൾ നേടി അന്റോണിയോ റൂഡിഗർ ചെൽസിയുടെ അക്കൗണ്ട് തുറക്കുകയായിരുന്നു. തടുർന്ന് അധികം താമസിയാതെ എൻഗോളോ കാന്റെയുടെ മനോഹരമായ ഗോളിലൂടെ ചെൽസി ലീഡ് ഇരട്ടിയാക്കുകയും ചെയ്തു.
രണ്ടാം പകുതിയിൽ മാറ്റങ്ങളുമായി ഇറങ്ങിയ ലെസ്റ്റർ സിറ്റി മത്സരത്തിലേക്ക് തിരിച്ചുവരാൻ ശ്രമം നടത്തിയെങ്കിലും പകരക്കാരനായി ഇറങ്ങിയ പുലിസിച്ച് ചെൽസിയുടെ മൂന്നാമത്തെ ഗോൾ നേടുകയായിരുന്നു. ഹക്കിം സീയെച്ചിന്റെ പാസിൽ നിന്നാണ് പുലിസിച്ച് ഗോൾ നേടിയത്. മത്സരത്തിൽ മൂന്ന് ഗോൾ മാത്രമാണ് ചെൽസി നേടിയെങ്കിലും കൂടുതൽ ഗോൾ നേടാനുള്ള സുവർണ്ണാവസരങ്ങൾ ചെൽസിക്ക് ലഭിച്ചിരുന്നു. 3 തവണയാണ് ചെൽസിയുടെ ഗോളുകൾ റഫറി ഓഫ് സൈഡ് വിളിച്ചത്.
