കേരള ബ്ലാസ്റ്റേഴ്സ് താരങ്ങളായ അയ്മനും അസ്ഹറും മൂന്നു ആഴ്ചത്തെ പരിശീലനത്തിന് ആയി പോളണ്ടിലേക്ക്

കേരള ബ്ലാസ്റ്റേഴ്‌സ് താരങ്ങൾ ആയ ഇരട്ട സഹോദരങ്ങൾ ആയ മുഹമ്മദ് അയ്മനും മുഹമ്മദ് അസ്ഹറും മൂന്നു മാസത്തെ പരിശീലനത്തിന് ആയി പോളണ്ടിൽ പോവും. കേരള ബ്ലാസ്റ്റേഴ്‌സ് റിസർവ് താരങ്ങൾ ആയ ലക്ഷദ്വീപ് സ്വദേശികൾ കഴിഞ്ഞ ഡൂറന്റ് കപ്പിൽ മിന്നും പ്രകടനം ആണ് നടത്തിയത്. അയ്മൻ 3 ഗോളുകളും ഒരു അസിസ്റ്റും നേടിയ ടൂർണമെന്റിൽ അസ്ഹർ 2 അസിസ്റ്റുകളും നേടി. ഒരു തവണ അസ്ഹറിന്റെ പാസിൽ അയ്മൻ ഗോളും നേടിയിരുന്നു.

നെക്സ്റ്റ് ജെൻ കപ്പിന് ആയി ലണ്ടനിലേക്ക് പോയ ബ്ലാസ്റ്റേഴ്‌സ് യൂത്ത് ടീമിലും ഇരുവരും സ്ഥാനം പിടിച്ചിരുന്നു. പോളണ്ട് ആദ്യ ഡിവിഷൻ ക്ലബ് ആയ റാക്വോ സെറ്റോചോ(Rakow Czestochow) യും ആയാണ് 19 കാരായ യുവതാരങ്ങൾ പരിശീലനം നടത്തുക. ടീമിന് ഒപ്പം കരാറിൽ എത്താൻ താരങ്ങൾക്ക് ആയാൽ അത് അവരുടെ കരിയറിന് വലിയ മുതൽക്കൂട്ടാവും. സ്‌കൂളിൽ നിന്നു കേരള ബ്ലാസ്റ്റേഴ്‌സ് ടീമിൽ എത്തിയ ഇരുവരും അണ്ടർ 15, 16, 18 തലങ്ങളിൽ കളിച്ച ശേഷം ബ്ലാസ്റ്റേഴ്‌സ് റിസർവ് ടീമിലേക്ക് വരെ ഉയരുക ആയിരുന്നു.