ലോക ടെസ്റ്റ് ചാമ്പ്യന്‍ഷിപ്പ് ഫൈനല്‍ വേദി നിശ്ചയിച്ചിട്ടില്ല എന്നറിയിച്ച് ഐസിസി

Worldtestchampionshipwtcfinal
- Advertisement -

ഇന്ത്യയും ന്യൂസിലാണ്ടും തമ്മിലുള്ള ലോക ടെസ്റ്റ് ചാമ്പ്യന്‍ഷിപ്പ് ഫൈനല്‍ വേദി നിശ്ചയിച്ചിട്ടില്ല എന്ന് പറഞ്ഞ് ഐസിസി. നിലവില്‍ സൗത്താംപ്ടണിനാണ് മുന്‍ഗണന എന്നാണ് ഇംഗ്ലണ്ട് ക്രിക്കറ്റ് ബോര്‍ഡും ഐസിസിയും അറിയിച്ചിരിക്കുന്നത്. ജൂണ്‍ 18 മുതല്‍ 22 വരെയാണ് ഫൈനല്‍ മത്സരം നടക്കുക.

ക്രിക്കറ്റിന്റെ മെക്കയെന്ന് അറിയപ്പെടുന്ന ലണ്ടനിലെ ലോര്‍ഡ്സ് ക്രിക്കറ്റ് ഗ്രൗണ്ടിലാവും ഫൈനല്‍ മത്സരമെന്നാണ് ഏവരും പ്രതീക്ഷിച്ചതെങ്കിലും എഡ്ജ്ബാസ്റ്റണ്‍, ഓള്‍ഡ് ട്രോഫോര്‍ഡ് എന്നിവയ്ക്കൊപ്പം സൗത്താംപ്ടണും വേദിയായി പരിഗണിക്കുന്നുണ്ടെന്നാണ് അറിയുന്നത്.

എന്നാല്‍ ഗ്രൗണ്ടിലെ സൗകര്യങ്ങള്‍ പരിഗണിച്ച് സൗത്താംപ്ടണിനാണ് മുന്‍ഗണന എന്നാണ് അറിയുവാന്‍ കഴിയുന്നത്. സ്റ്റേഡിയത്തിനോട് ചേര്‍ന്ന് തന്നെ ഫൈ സ്റ്റാര്‍ സൗകര്യം ഉള്ളതിനാല്‍ തന്നെ ഈ കോവിഡ് കാലത്ത് യാത്ര വിലക്കും മറ്റും വരുന്ന സാഹചര്യങ്ങളില്‍ ഏറ്റവും അനുയോജ്യമായി മത്സരം നടത്തുവാന്‍ ഉള്ള സൗകര്യം സൗത്താംപ്ടണിലാണെന്നാണ് കണ്ടെത്തല്‍.

ലോര്‍ഡ് ക്രിക്കറ്റ് ഗ്രൗണ്ടിന്റെ നടത്തിപ്പുകാരായ മെരിലേബോണ്‍ ക്രിക്കറ്റ് ക്ലബ് അധികാരികള്‍ ഉറപ്പ് നല്‍കാത്തത് ആണ് ലോര്‍ഡ്സില്‍ നിന്ന് മത്സരം മാറ്റി വയ്ക്കുവാന്‍ ഇടയായിരിക്കുന്നതെന്നാണ് ലഭിയ്ക്കുന്ന വിവരം. വരും ദിവസങ്ങളില്‍ ഐസിസി വേദി സംബന്ധിച്ച് അന്തിമ തീരുമാനം പുറത്ത് വിടുമെന്നാണ് അറിയുന്നത്.

Advertisement