ഏകദിനത്തില്‍ തന്റെ 250ാം വിക്കറ്റ് നേടി ഷാക്കിബ് അല്‍ ഹസന്‍. ഇന്ന് ബംഗ്ലാദേശിനെതിരെ ദക്ഷിണാഫ്രിക്കയുടെ എയ്ഡന്‍ മാര്‍ക്രത്തെ വീഴ്ത്തിയാണ് ഷാക്കിബിന്റെ ഈ നേട്ടം. 45 റണ്‍സ് നേടിയ താരത്തെ വീഴത്തി നിര്‍ണ്ണായകമായ ബ്രേക്ക് ത്രൂവാണ് ഷാക്കിബ് ടീമിനു നേടിക്കൊടുത്തത്. രണ്ടാം വിക്കറ്റില്‍ 53 റണ്‍സ് കൂട്ടുകെട്ടുമായി ഫാഫ് ഡു പ്ലെസി – എയ്ഡന്‍ മാര്‍ക്രം കൂട്ടുകെട്ട് ബംഗ്ലാദേശിനു ഭീഷണിയാകുമെന്ന ഘട്ടത്തിലാണ് ഈ വിക്കറ്റ്.
ഇന്നത്തെ മത്സരത്തില്‍ 10 ഓവറില്‍ നിന്ന് 50 റണ്‍സ് മാത്രമാണ് ഷാക്കിബ് വഴങ്ങിയത്. മത്സരം 21 റണ്‍സിനു ജയിക്കുവാന്‍ ബംഗ്ലാദേശിനു സാധിച്ചു. നേരത്തെ ബാറ്റിംഗിനിടെയും ഷാക്കിബ് നിര്‍ണ്ണായകമായ 75 റണ്‍സ് നേടിയിരുന്നു. മൂന്നാം വിക്കറ്റില്‍ മുഷ്ഫിക്കുര്‍ റഹിമുമായി നേടിയ 142 റണ്‍സ് കൂട്ടുകെട്ടാണ് ബംഗ്ലാദേശ് ഇന്നിംഗ്സിനു അടിത്തറയായി മാറിയത്.
