തങ്ങളുടെ പ്രകടനത്തിനെക്കാള് മികച്ച ടീമാണ് ബംഗ്ലാദേശ് എന്ന് പറഞ്ഞ് ടീം നായകന് ഷാക്കിബ് അൽ ഹസന്. ഇന്നലെ നെതര്ലാണ്ട്സിനെതിരെയുള്ള 87 റൺസ് തോൽവിയ്ക്ക് ശേഷം പ്രതികരിക്കുകയായിരുന്നു അദ്ദേഹം.
അടുത്തിടെ ടീമിന്റെ ഏറ്റവും മോശം പ്രകടനം ആണ് ഇതെന്നും എന്നാൽ തന്റെ ടീം ഇതിലും മികച്ചതാണെന്നും ഷാക്കിബ് കൂട്ടിചേര്ത്തു. അഫ്ഗാനിസ്ഥാനെതിരെ ആദ്യ മത്സരത്തിൽ വിജയിച്ച ശേഷം ബംഗ്ലാദേശ് ഒരു മത്സരത്തിലും പിന്നീട് വിജയിച്ചിട്ടില്ല.
2007 ലോകകപ്പ് മുതൽ കുറഞ്ഞത് മൂന്ന് മത്സരങ്ങളെങ്കിലും ലോകകപ്പിൽ വിജയിച്ചിട്ടുണ്ടെന്ന ടീമിന്റെ സ്ട്രീക്ക് അവസാനിക്കുവാനുള്ള സാധ്യതയും ഏറെയാണ്. പാക്കിസ്ഥാന്, ശ്രീലങ്ക, ഓസ്ട്രേലിയ എന്നിവരാണ് ടീമിന്റെ അവശേഷിക്കുന്ന എതിരാളികള്.
എന്ത് കൊണ്ട് ടീം ഇത്തരത്തിൽ കളിച്ചുവെന്നതിന് തനിക്ക് ഉത്തരമില്ലെന്നും ഇത് ബംഗ്ലാദേശിന്റെ ലോകകപ്പ് ചരിത്രത്തിലെ തന്നെ മോശം പ്രകടനമാണെന്നും ഷാക്കിബ് കൂട്ടിചേര്ത്തു.
