ബാറ്റിംഗില്‍ രഞ്ജിത്ത്, ബൗളിംഗില്‍ മഹേഷ്, 14 റണ്‍സ് വിജയം നേടി ഐഡൈനാമിക്സ്

ടിപിഎലില്‍ ഇന്ന് ട്രൈസന്‍സിനെതിരെ 14 റണ്‍സിന്റെ മികവാര്‍ന്ന വിജയം കരസ്ഥമാക്കി ഐ ഡൈനാമിക്സ്. ആദ്യം ബാറ്റ് ചെയ്ത് 71/9 എന്ന സ്കോര്‍ നേടിയ ഐഡൈനാമിക്സ് എതിരാളികളെ 57 റണ്‍സില്‍ ഒതുക്കിയാണ് വിജയം കരസ്ഥമാക്കിയത്. 10 പന്തില്‍ 25 റണ്‍സ് നേടിയ ട്രൈസന്‍സ് താരം ഷൈന്‍ ഉയര്‍ത്തിയ വെല്ലുവിളിയെ അതിജീവിച്ചാണ് ഐഡൈനാമിക്സിന്റെ വിജയം. കരോള്‍ 13 റണ്‍സ് നേടിയപ്പോള്‍ മറ്റു താരങ്ങള്‍ക്കാര്‍ക്കും മികവ് പുലര്‍ത്താനായില്ല. എട്ട് വിക്കറ്റാണ് ടീമിന് നഷ്ടമായത്. ഐഡൈനാമിക്സിന് വേണ്ടി മഹേഷ് മൂന്നും വിനോദ് ഗോപകുമാര്‍ രണ്ടും വിക്കറ്റ് നേടി.

നേരത്തെ ആദ്യം ബാറ്റ് ചെയ്ത ഐഡൈനാമിക്സിന് വേണ്ടി രഞ്ജിത്ത് 13 പന്തില്‍ 22 റണ്‍സ് നേടി. വിപിന്‍ ജോണ്‍(11), ജെബ ഓസ്റ്റിന്‍(10) എന്നിവരും രണ്ടക്ക സ്കോറിലേക്ക് എത്തി. ട്രൈസന്‍സിന് വേണ്ടി കരോളും ശ്രീരാജ് ശശീന്ദ്രനും മൂന്ന് വീതം വിക്കറ്റ് വീഴ്ത്തി.