ഇന്ത്യക്ക് എതിരായ ആദ്യ ഏകദിനത്തിൽ തസ്കിൻ അഹമ്മദ് കളിക്കില്ല

നടുവേദനയെത്തുടർന്ന് ഡിസംബർ 4 ന് മിർപൂരിൽ ഇന്ത്യയ്‌ക്കെതിരെ നടക്കുന്ന ആദ്യ ഏകദിനത്തിൽ നിന്ന് ബംഗ്ലാദേശ് പേസ് ബൗളർ തസ്കിൻ അഹമ്മദിനെ ഒഴിവാക്കി. തസ്‌കിന്റെ പുറം വേദന തുടരുന്നതിനാൽ ആദ്യ മത്സരത്തിൽ താരം ഉണ്ടാകില്ല എന്ന് ബിസിബി ചീഫ് സെലക്ടർ മിൻഹാജുൽ പറഞ്ഞു. കൂടുതൽ പരിശോധനകൾക്ക് ശേഷം മാത്രമെ തസ്കിൻ ബാക്കി മത്സരങ്ങളിൽ ഉണ്ടാകുമോ എന്ന് വ്യക്തമാവുകയുള്ളൂ.

സന്നാഹ മത്സരത്തിൽ പരിക്കേറ്റ ഓപ്പണർ തമീം ഇഖ്ബാലും ഇന്ത്യക്ക് എതിരെ കളിക്കുന്നത് സംശയമാണ്. തമീമിന്റെ സ്കാൻ റിപ്പോർട്ടിനായി കാത്തിരിക്കുകയാണ് എന്നും ബംഗ്ലാദേശ് ക്രിക്കറ്റ് ബോർഡ് അറിയിച്ചു.