ആദ്യ സെഷന്‍ കഴിയുമ്പോള്‍ ഇന്ത്യ കരുതുറ്റ നിലയില്‍, അര്‍ദ്ധ ശതകം നേടി ശുഭ്മന്‍ ഗില്‍

ഓസ്ട്രേലിയ എ യ്ക്കെതിരെ സിഡ്നിയില്‍ നടക്കുന്ന ഡേ നൈറ്റ് സന്നാഹ മത്സരത്തില്‍ കൂറ്റന്‍ ലീഡിലേക്ക് ഇന്ത്യ നീങ്ങുന്നു. ഇന്ത്യ തങ്ങളുടെ രണ്ടാം ഇന്നിംഗ്സില്‍ 27 ഓവറില്‍ നിന്ന് 111 റണ്‍സാണ് രണ്ട് വിക്കറ്റ് നഷ്ടത്തില്‍ നേടിയത്. ടീമിന് 197 റണ്‍സിന്റെ ലീഡാണ് കൈവശമുള്ളത്.

പൃഥ്വി ഷായെ വേഗത്തില്‍ നഷ്ടമായ ഇന്ത്യയ്ക്ക് വേണ്ടി ശുഭ്മന്‍ ഗില്ലും മയാംഗ് അഗര്‍വാളും ചേര്‍ന്ന് 104 റണ്‍സ് കൂട്ടുകെട്ടാണ് നേടിയത്. ആദ്യ സെഷന്‍ അവസാനിക്കുന്നതിന് തൊട്ടുമുമ്പാണ് 65 റണ്‍സ് നേടിയ ഗില്ലിനെ ടീമിന് നഷ്ടമായത്.

മയാംഗ് 38 റണ്‍സുമായി പുറത്താകാതെ നില്‍ക്കുമ്പോള്‍ ഹനുമ വിഹാരിയാണ്(0*) താരത്തിന് കൂട്ടായി ക്രീസിലുള്ളത്. ഓസ്ട്രേലിയ എ യ്ക്കായി മിച്ചല്‍ സ്വെപ്സണും മാര്‍ക്ക് സ്റ്റെകേറ്റിയും ഓരോ വിക്കറ്റ് വീതം നേടിയിട്ടുണ്ട്.