ലോകത്ത് കൊറോണ പകര്‍ന്ന് പിടിക്കുന്ന സാഹചര്യത്തില്‍ ബംഗ്ലാദേശില്‍ മാസ്ക് കമ്പനികള്‍ വില വര്‍ദ്ധിപ്പിച്ചതിനെതിരെ പ്രതിഷേധവുമായി ബംഗ്ലാദേശ് പേസ് ബൗളര്‍ റൂബല്‍ ഹൊസൈന്‍. അഞ്ച് ടാക്ക മാത്രം വിലയുള്ള മാസ്കുകള്‍ ഈ സാഹചര്യം മുതലെടുത്ത് 50 രൂപയ്ക്കൊക്കെയാണ് കമ്പനികള്‍ വില്‍ക്കുന്നതെന്നാണ് റുബല്‍ ഹൊസൈന്‍ പറയുന്നത്.
സാനിറ്റൈസറുകള്‍ക്കും മാസ്കുകള്‍ക്കും ആവശ്യം ഉയര്‍ന്നപ്പോള്‍ കമ്പനികള്‍ വില കൂട്ടുകയാണുണ്ടായത്. തന്റെ ഫേസ്ബുക്കില്‍ ബംഗളയിലാണ് റൂബല്‍ ഹൊസൈന്‍ ഈ കമ്പനികളുടെ നിലപാടിനെക്കുറിച്ച് വ്യക്തമാക്കിയത്.
നമ്മള്‍ അത്യാഗ്രഹവും ക്രൂരതയും നിറഞ്ഞ രാജ്യത്തിലാണ് ജീവിക്കുന്നത്. ചൈനയില്‍ ഈ മഹാമാരിയുടെ പേരില്‍ മാസ്കുകള്‍ക്ക് വില കുറച്ചപ്പോള്‍ നമ്മുടെ നാട്ടില്‍ അത് ഉയര്‍ത്തുകയാണ് അത്യാഗ്രഹികള്‍ എന്ന് റൂബല്‍ പരാമര്‍ശിച്ചു. 5 ടാക്ക വിലയുള്ളതിന് 50ഉം 20 ടാക്കയുടേത് 150നുമൊക്കെയാണ് ഈടാക്കുന്നത്.
